Compilatiecorpus Historisch Nederlands 1.0 (CHN): ambtelijke teksten 1250-1800: oudenaarde_1324_1

<begin>
</begin>
<main>
Men sal zoene ghelden aldus doutste broeder sal hebben de montzoene dats terden deel van der zoenen binnen XL daghen vergoiden ende daernaer sal hi hebben tfierendeel ute elken vierendeele van den vieren ende daeraf moet hi ghemoeden sine broedere op dat hise heeft elken sine groette ghelyc hem selven sonder dat de montzoene alleene hem blyft Ende ne heeft hi negheene broedere so blyft hem de hilt alleene
Voert rechtzwers zyn sculdech te hebbene de twee deel van der zoenen van der sommen diere blyft in elc vierendeel elc even vele die verjaert zyn ende doem sal hebben ghelyc den rechtzwers
Voert anderszwers zullen hebben de twee deel van datter blyft naer de maniere van den rechtzwers
Voert derdelinghe elc even vele van al dat daer boven blyft ghelyc den andren Ende doutste oem of doutste oems kint ende doutste naeste man ute elken vierendeele zullen zeker doen elc van haerre ghedeele rechte ende ne mochts de naeste niet doen so soudt de ghene doen altoes diere naest ware
Waer dat zoene heft c lib doutste broeder heft xxxiii lib vi schel viii d over de montzoene binnen xI daghen vergolden ende hi sal oec heffen xvi lib xiii schel iiii d ende van dien xvi lib xiii schel ende iiii d moet hi sinen broederen gheven indien dat hise heeft ghelyc hem selven De rechtzwers van sfaders alven zelen heffen xvi lib xiii schel iiii d ende also vele de rechtzwers van der moeder zide ende elc even vele Voert danderzwers van sfaders alven v lib xi schel ende iii d Ende anderzwers van der moeder alven v lib xi schel ende iii d ende elc even vele Voert zelen heffen derdezwers van sfaders alven ix schel vi d ende van der moeder alven diere ghelike ende elc even vele
Dese ordonnanche van zoenen es in diere manieren heftet meer heftet min dat elc sal heffen zyn avenant naer d'ordinanche van hier voren
Item es bezocht ende bevonden met groeter vorzienicheden waer dat een zoendinc toebehoort eenen kinde onder sinen jare dar men beloft tkint tsoendinghe te bringhene alst te sinen jaren comen sal syn ofte partien weder hare ghelt gheven eist dat tkint tsoendinc angaen wille dat het sculdich es te hebben de montsoene gheheel ende sonder cost ende darmede siin recht uter maghezoene ghelyc ofte hi van voren te sinen jaren waren gheweest ende ontseit het zoendinc so blyft het buten alleene
</main>
<end>
</end>