Compilatiecorpus Historisch Nederlands 1.0 (CHN): ambtelijke teksten 1250-1800: oudenaarde_1329_1

<begin>
Kenlic moet zyn allen den ghenen die nu zyn ende hierna wesen zelen
</begin>
<main>
dat schepenen ende de raet vander poert van Audenaerde an deene side ende Symoen van Varnewyc ende Willem de Hont alse procurerers machtech over de castelrie van Audenarde an dander zide zyn gheaccordeert ende overeen ghedreghen met eenen goeden ghemeenen consente in der manieren dat hiernaer volghet
Dats te wetenne alse van sconincs zoenghelde van Vrankerike ende van sgraven rente van Vlaendren alse vanden xm lb torn sjaers dat daeraf van dien ii parcheelen negheene settingghe ne zelen ghelden butenporters no portessen van Audenaerde no van Pamele die binnen vriheden van Audenaerde of van Pamele wonen of zelen comen wonen op dat zy binnen vriheden vorseit wonen in den tyt dat men buten set ende jaer ende dach bliven wonen
Voert es te wetenne dat alle de ghene die houde porters of houde portessen zyn van Audenaerde of van Pamele wonachtech buten vriheden van Audenaerde ende van Pamele dats te verstane die porters ofte porterssen waren tAudenaerde of te Pamele in den tyt dat de wych te Mons in Pevele was dat die no haer hoer van haren lichame comende behoerende ten poerterscepe van Audenaerde of van Pamele na de maniere van houden poerters comende buten niet ne ghelden en ware of zy hervachtichede ghecreghen hadden ende hilden die hem toe ware comen ende hilden van den ghenen die gheene poerters houde no houde poertessen ne waren daeraf van alsulker hervachticheden die zy ghecreghen hadden sint dat de wych te Mons in Pevele was die men vonde houdende souden zy ghelden buten settinghe ghelyc andren lieden in de castelrie van Audenaerde alse van den ii parcheelen vorseit
Voert alle nieuwe porters ende nieuwe portessen van Audenaerde ende van Pamele wonachtech buten vriheden van Audenaerde ende van Pamele dats te verstane die poerters ende portessen worden zyn eerstwarf tAudenaerde of te Pamele sint dat de wych was te Mons in Pevele ende niet comen ne zyn no comen ne zelen als houder porters kindre of van houders poerters lichame behoerende ten poerterscepe als houde porters ende houde portessen van Audenaerde of van Pamele dat die vorseide nieuwe poerters ende nieuwe portessen buten zelen ghelden settinghe vanden ii parcheelen vorseit ghelyc andren lieden in de castelrie van Audenaerde
Voert es te wetenne hadden houde poerters of houde portessen van Audenaerde of van Pamele wonende buten vriheden van Audenaerde ende van Pamele hervachtichede vercocht of ghedarft zy ofte haer hoer ofte hare kindre behoerende ten poerterscepe van Audenaerde of van Pamele alse houde poerters of houde portessen daeraf ne behoeret het ter castelrien settinghe niet Ende die bate alse daeraf te settenne zouden hebben de ghene dient schepenen van Audenaerde goet soude dincken Ende alse houde poerters of houde portessen van Audenaerde of van Pamele trecken wonen buten vriheden van Audenaerde ende van Pamele zo zelen zy ghelden buten ghelyc houden poerters also langhe alsi buten wonen Ende nieuwe poerters ende nieuwe portessen alsi buten vriheden van Audenaerde ende van Pamele varen wonen so moeten zy buten ghelden settinghe also langghe alsi buten wonen ghelyc nieuwen poerters die buten wonen van den ii parcheelen vorseit Ende ghecreghen poerters of portessen wonachtech binnen vriheden van Audenarde of van Pamele hervachtichede jeghen die van der castelrien van Audenaerde die ne soude niet behoeren ter settinghen vander zelver castelrien Ende ghecreghen die van der castelrien van Audenaerde hervachtichede jeghen porters of porterssen wonachtech binnen vriheden van Audenaerde of van Pamele die zoude behoeren ter settinghen buten vander castelrien vorseit vanden vorseiden ii parcheelen
</main>
<end>
In orconscepen der waerheden van al dien dat hier vorseit es ende om dat al dit moet zyn ende bliven goet vast ghestade ende wel ghehauden teeuweliken daghen zo zyn dese lettren ghezeghelt metten zeghelen edelre ridders ende werder myns her Raes van Gavere heere van Nokere ende myns her Oste heere van Steenhuse ende van Avelghem ende metten zeghelle ser Jan Pellecoes prochipape van Avelghem ende deken vander kerstinhede van Audenaerde in den tyt dat dese lettren ghemaect waren ende metten zeghelen Symoens van Varnewyc ende Willems sHonts alse procurerers voren ghenoomt Ghegheven int jaer Ons Heeren mccc ende xxix talf hoymaende
</end>