Compilatiecorpus Historisch Nederlands 1.0 (CHN): ambtelijke teksten 1250-1800: oudenaarde_1334_1

<begin>
Dat moeten weten alle die zijn Ende selen zijn
</begin>
<main>
dat der gheerart rikeman heeft ghegheuen naer sijn lijf in puerre aelmoesenen den hospitale van audennaerde ten sieken bouf 1 cccc lb ende lx lb parisise oude groete tornoise ouer xij d ofte de weerde ouer sine ziele sijns vader sire moeder ende ouer alle sire vrienden zielen De welke somme van ghelde vorseit der gheerart vors heeft bewijst met voegde den hospitale vorseit te hebbenne ende te heffenne naer sijn lijf op iij bunre lants die hi heeft ligghende in eenen sticke te beuere op de coutre die men heet ter haghe vten welken gaet te chense xij d parisise den heere van hayshoue Ende ware alsoe dat dospitael vorseit ofte de bringher van deser cyrographien van sospitaels aluen dit vorseide lant af wonne ouer de vorseide somme van ghelde so moesten die van den hospitale vorseit bliuen haudende herfelike ten profite van den sieken vorseit Ende ware alsoe dat ser gheerarts hoer vorseit dit vorseide lant loeste jeghen tforseide hospitael so moesten die van den hospitale dit vorseide ghelt legghen an heruachtichede herfelike duerende ten zieken bouf vorseit Ende mids desen so moeten die van den hospitale vorseit doen ser gheeraerts vorseit jaerghetide jaerleecs ende sire vorders vorseit
</main>
<end>
orconde der jan de brune alse schepenne in audennarde Ende jnghel pennjnc alse heruachtech Dit was ghedaen jnt jaer ons heeren mccc ende xxxiiij den achtersten dach van decembre
</end>