Compilatiecorpus Historisch Nederlands 1.0 (CHN): ambtelijke teksten 1250-1800: oudenaarde_1335_1

<begin>
Jc ihan van landenghem doe te wetene allen lieden
</begin>
<main>
dat die van den hospitale van audenarde hebben ghecocht wel ende wetteleke jeghen pietren vten riede viertech scellinghe parisise erfle-ker renten siaers dies anees van in eruen es bewijst op twe bunre lants lettel meer oft miin ligghende in de prochie van audenghem also de tsartre claerleke in heeft den welken die van den vorseiden hospitale hebben beseghelt met sbaillius ende scepenen zeglen te dien tiden wethou-ders taudenghem van michiels haluen van landenghem miints vader ende dat bi siin orloue om de re-dene dat men tforseide lant van hem hilt den welken tsartre ende orlof ic consentere ende houde ouer goet ende ghestade van pointe te pointe ende gheloue hemleden van den vorseiden hospitale
</main>
<end>
jn orconscepen van warheden jc hebbe dese lettre gheseghelt met minen propren zegle ende was ghedaen int jaer van gracien doe men screef dusentech driehondert vier en dertech jn sporcle
</end>