Compilatiecorpus Historisch Nederlands 1.0 (CHN): ambtelijke teksten 1250-1800: oudenaarde_1344_1

<begin>
wii arnout de smet bailiu sente baues daneel scautete sente baues Goesiin pottier jacop de smet jan de brune rase ser bruuns clais van mendonck ian van der herlo Ende willem bruniinch Scepenen sente baues makent cont ende kenlech allen den ghenen die dese syrogreffie sullen zien of horen lesen
</begin>
<main>
Dat voer ons comen siin heersame ende vroede persone meester maechelein van sente baues jan siin broeder Ende joncfr mergriete haere beeder suster wel bedacht ende omme profiit van haerlieder ende voersaten ziele ebben bekent gheseit ende verliit dat sii gheuen ende ghegheuen ebben den godshuse ende ospitaele te audenaerde zesse lib par siaers erueliker ende heweliker renten te effene iaerlex teerst dat ionfr volckwiif haerlieder suster suster in ospitael vors sal siin gheuaren van liue te doet vp ende pant twe buunre mersch gheleghen te elsine bi maechline ouer de leye
</main>
<end>
Ghedaen in kenlicheden voer ons scepenen vors ende orconscepen als heruachteghe liede jn ghent baudiin ruum gherolf bette goesiin mulaert jnt iaer ons heren als men screef mccc vier ende viertech den vierden dach van aprulle
</end>