Compilatiecorpus Historisch Nederlands 1.0 (CHN): ambtelijke teksten 1250-1800: oudenaarde_1361_1

<begin>
Wij zuster beatrice van der asselt prieuse van den hospitale onser vrouwen van audenaerde Ende zustren ende broeders van den zeluen hospitale doen te wetene allen lieden
</begin>
<main>
dat wij hebben ghegheuen jn loeyalen pachte steuen maeldereye fransoeys sone pietre den cupre de Erue die wij hebben ligghende jn de poert van audenaerde jeghen Sente amants capelle oestwert daer wilen op woende wouter van der haghe teenen termine van viere waruen 1 2 jaren achter een duerende van kersauonde jnt jaer dertienhondert een ende zestich twe ende zestich om-me drie pont paris elx siaers alsulke paris alse de heeren van den lande jaerlex ontfaen zelen van haren renten ten daghen dat dese pacht valt te gheldene deen heelt van den Eersten pachte te kersauonde jnt jaer dusentech driehondert twee ende drie ende zestech ende dandre heelt te sente jansmesse daer naest commende Ende alsoe voert te gheldene van jare te jare den vors termijn duerende voert so vant 3 pieter vors op dese vorsei-de Erue een huus ende cateyle dwelke huus ende cateyle hi cochte jeghen ons omme tiene pont grote dewelke tiene pont grote vors de vors 4 pieter ons heeft wel ende soffisantelic betaelt waer af wij ons hauden wel ghepaeyt ende vernoucht Ende hebben der af quiteghescolden ende scelden quite den vors steuene pietren zinen nacommers ende allen den ghenen daer quitesceldinghe der af toebehoert Ende in manieren dat de vorseide steuen pieter ende zine nacommers zelen moeten hauden staende tvorseide huus ende cateyle op derue vors te haer lie-der profite al den vors termijn duerende dwelke huus ende cateyle zijn altoes pant omme ons ende onser na-commers der an te verhaelne den vors pacht Ende tvorseide huus ende alle dandre cateyle die wesen zullen op derue vors ten ende van den vors termine die zelen wij moeten hebben bi prise van goeden lieden ghe-like dat zij ter erden laghen Ende omme dat wij vorseide prieuse zustren ende broeders willen dat alle dese vorseide dinghen bliuen goet vaste ghestade ende wel ghehouden van ons ende van onsen nacommers
</main>
<end>
So hebben wij jn kennessen der waerheden dese jeghenwordeghe lettren gheseghelt metten ghemeenen zeghele ons conuents dit was ghedaen jnt jaer ons heeren dusentech driehondert een ende zestech sfriendaechs vor sente katerinen dach lxiij. den .xxvij.sten dach van hoeymaent
</end>