Compilatiecorpus Historisch Nederlands 1.0 (CHN): ambtelijke teksten 1250-1800: oudenaarde_1364_1

<begin>
WJj Schepenen Ende Raed van der poort van Audenarde doen te wetene allen den ghonen die dese lettren zullen zien ofte hoeren lesen
</begin>
<main>
dat wij merkende ende aneziende de goede jonste de trouwe ende de natuerlike minne die de goede liede van den ambachte van den keersma-kers van wasse van Roete veinstre van der vetterware van zuuele van frute van asschen Ende van naghelen houden van der vorseider poort hebben ende draghen Tonsen Rechten ende natuerliken heere ende prinche den graue van vlaendren Ende ter poort waert vorseit Ende dat toeghende jnt gheweerke hebben den vornomden keersmakers ende veinstre haudende van der vetterware Ende van den pointen vors Ende haren naercommers wonachtich binnen vryheden van audenarde van pamele Ende binnen cauchieden met vorzienicheden ende bi Ri-pen Rade te meer stonden der vp ghehadt gheconsentert ende ghewillekuert consenteren ende willekueren bi wille ende bi consente van den bailliu te houdene ende te vzeerne van nv voort an de kueren pointe ende ordinancen hier naer volghende Om hare ambacht mede te houdene met ghaders den borzemakers ende meersseniers daer zij mede ghestelt zijn ter ordinanchen van Scepenen vors hare tenten pawelioene ende andre orboren den ambachte vors behoerende mede te makene ende onsen vors prinche ende der poort tallen tiden datz te doenne zal zijn mede te dienne
jnt Eerste dat elc van den keersmakers van wasse van Roete veinstre van der vetterware houdende Ende van den pointen vors op den tijt dat dezen charter ghemaect ende gheconsontert was van scepenen vors jn dien tijt wezende Niemen van dien vors en mach vry zijn jnt vorzeide ambacht noch tambacht vors hauden ofte doen binnen audenarde binnen pamele Ende binnen den kauchieden van der poort vors Ende op twe milen naer de poort binder castelryen van audenarde behoerende ter vryeden van der poort vors hij en moet heer metten ambachte vors inter-den hem vryen doen scriuen Ende elc gheuen twintech scellinghen par Te gane int proffijt van den ambachte vors Omme alle coste laste ende commer thelpen draghene dies tambacht vors heeft ghehadt ofte te doenne zoude moghen hebben jn allen zaken onderdanich te zine den heere ende der wet ende den ambachte vors
jtem elc van desen vors dat hi hem zal doen scriuen binnen xiiij nachten naer dat men deze ordinanchen ende chaertre zal gheuen te kennenne Elcken jnt ghemeene toeghende ende verclarende van worde te worde zonder scamp ende malicie op de boete van tiene scell par
Jtem elc man vry int vorzeide ambacht mach elc van zinen kindren vryen met tiene scell par ende vijf scell par van kennessen
jtem zo wat vremder manne die tforzeyde ambacht leeren ofte doen wille die moet leeren Een jaer Ende gheuen den ambachte vors tiene scell par ende vijf scell paris van kennessen Ende ten hende van den jare zoe moet de leercnape zinen termijn jn ware doen voor de vinders van den ambachte vors Ende als hij meester werden wille ende veinstre hauden van der vetterware ende van allen den pointen vors zoe moet hij gheuen den ambachte vors Eer viere ponden paris ende tiene scell par van kennessen
Jtem niet vry wesende jnt vorzeyde ambacht ne mach weghen met scalen no met ghemete meten no vercoepen noch omme draghen no doen draghen dat den ambachte van den vettewariers ofte van den pointen vors toebehoert het en ware op vrye mae[r]cdaghe te venten commende dan mueghen zij weghen onder zesse ponden weghens Ende al dat hier bouen ware dat en mach men ooc hemlieden niet verbieden behauden dien dat zijt leueren jn de kale metten ghewichte Ende metten ghemete van der poort ofte dat zijt vercoepen jn groeten Ende zo wie dat hier bouen dade alsoe menich waeruen als ment beuonde verbuerde telker waerf twinthech scell par
Jtem niemen mach maken noch vercoepen ne gheen goed den ambachte van der vetterware ofte van den pointen vors toebehorende binnen audenarde binnen pamele ende binnen den cauchieden vors ter vryeden behoerende van der poort vors noch van buten bringhen en sij dat de warderers diere scepenen vors toe ghestelt hebben dat goed mueghen warderen corregieren ende te nieute doen op haren Eet Ende voord op de boete van twintech scell par
Jtem so wie van buten onghewardert van den warderers vors ziin goed vors vercochte verbuerde vijf scell par telker waerf dat men der mede beuonde
jtem niemen ter vryeden behoerende en mach keersen vors noch ander goed den ambachte van der vetterware ende pointen vors toebehoerende draghen no doen draghen buten kauchieden van audenarde no van pamele jn de castelrie vors es hi vry es hi onvry telker waerf dat men der mede beuonde op de boete van twintech scell par
Jtem so wie ter maerct met goede van den ambachte vors toebehoerende wille staen die moet loten na costume van der poort ende staen elc neffens zinen gheselle ende hauden ziin stal Ende alle de ghene van buten commende niet vry wesende jn tforzeide ambacht moeten staen neffens an thende van den ghenen die vry ziin jnt ambacht vors Ende wie anders stonde ofte dade es hi vry es hi onvry telker waerf dat ment beuonde dat ware op de boete van vijf scell par
Jtem niemen mach jet doen dat den vors ambachte behoort noch ziin goed te venten zetten op sondaghe noch op vighillie daghe buten veinstren en sij op maercdaghe eist case eist ander goed op de boete van vijf scell par telker waerf dat men der mede beuonde Alle de ghone die vry ziin jnt tforzeide ambacht moeten staen te scote te lote ende ter goeder ordinanchen van den vors ambachte cost ende last helpen draghenne biden vinders van den ambachte vors Ende elc moet hebben wapine ende harnasch naer sijn goed ende nar sinen staet op de boete van twintech scell par telker waerf
Jtem so wie niet quame ghewapent ter maerct onder de baniere van den ambachte vors tallen tiden dat de baniere van onsen prinche ofte van der poort vors ter maerct zal ziin verbuert vijf scell paris Ende buten als te doene zal ziin tienne scell par
Jtem so wie niet en quame daer hem de vinders vors ontboden ofte zeiden binder poort Omme zaken van onsen prinche van der poort ofte van den ambachte vors verbuerd telker waerf twee scell par het en ware van al dezen dat hij hadde redelike nootzake ten zecghene van den vinders ofte van Scepenen vors
Jtem so wie ouerhoe-rich ofte Rebel ware ofte den vinders leelic toe sprake ofte den warderers vors ofte leelijchede zeide ofte dade jn Eenigher manieren om zake van der poort van den ambachte ofte van haerre officie doende verbuerde telker waerf twintech scell paris nochtan soudijt betren moeten alsoot vors es Ende men zoude hem ziin ambacht verbieden toter tijt dat hijt ghebetert hadde bi den vinders bi den warderers ofte bi scepenen vors
jtem so wie bouen verbode wrochte ofte tambacht vors dade ofte niet betren wilde verbuerde telker waerf twin-thech scell par
Jtem zo waer ghescil ofte twist gheualt tusschen Eenighen van den vorseiden ambachte daer no minke no paisbrake no verdebrake wettelijc en es dat mueghen vinders van den ambachte vors ende ziin sculdich te paise ende te goede te makene Ende so wat sententien ofte zecghene zij der vte zeiden ofte zecghen zullen moeten partien jn beeden ziden hauden Ende waer jemen van hemlieden die der jeghen dade ofte stake ofte tsecghen vors niet hauden ne wilde dat ware telker waerf op de boete van twintech scell paris Ende dien soude men ziin ambacht verbieden toter tijt dat hijt ghedaen hadde ende ghebetert ziin hoeueroerichede bi zinen vinders beleeders jnt tforzeyde ambacht dies den ambachte vors toebehoort dats te wetene een van audenarde ende Een van pamele ofte een van binnen kauchieden wonende vors dewelke de houde vinders altoos telken onser vrouwen daghe lichtmesse ofte als men Scepenen vermaken zal kiesen zullen op haren Eet ende bringhen haer goedinken vor scepenen beede poorters ende buucuast met alre woonste wonachtich binnen audenarde ende binnen pamele ofte binnen kauchieden vors Ende zullen haren Eet doen jnt openba[re] onsen prinche vors goed ende ghetrouwe te sine ende den heere ende der wet goed ende onderdanich den staet trecht ende ordinancen van der poort vors thoudene trecht de kueren ende de statute van den ambachte vors thaudene Ende al te doene dat rechte vinders ende goede ghetrouwe liede sculdich ziin te doene alsoe moet hemlieden god helpen ende voort alsoe der toe behoort Oocme-de de vinders van den ambachte vors zullen elx jaers ten afghane eene waerf goede Rekeninghe moeten doen vor de goede liede van den ambachte ofte vor de gansce partie van den goede van den ambachte vors dewelke vorseide boeten ende mesdaden zullen deelen jn drien datz te wetene deen dardendeel onsen vors prinche tander der poort Ende terde den ambachte vors Ende al dat hier vors es Ende elc point zonderlinghe hebben wij belooft ende belouen te haudenne ende te vulcommene den vors ambachte ouer ons ende ouer onse narcommers jn al der manieren vors behauden dien altoos dat wij ende onse narcommers altoos machtich ziin ende bliuen de vors kueren pointe ende ordinanchen alle ofte som te meersene te minderne te ver anderne te nieute te doene Ende te wederrou-pene ter meester Eeren nutscepe ende pourfite van onsen prinche van der poort Ende van den ambachte vors
</main>
<end>
Jn kennessen ende in orconscepen van waerheden hebben wij den vors ambachte ghegheuen dese lettren bezeghelt vtehanghende metten groten zeghele der vorseider poort dit was ghedaen den zestiensten dach van decembre jnt jaer ons heeren dusentich drie ondert viere ende Tsestich
</end>