Compilatiecorpus Historisch Nederlands 1.0 (CHN): ambtelijke teksten 1250-1800: oudenaarde_1364_2

<begin>
Dat moeten weten alle die ziin Ende selen ziin
</begin>
<main>
dat katerine scupers heinric joffroets wedewe Ende jan katerine Ende mergriete hare kindre die soe hadde van heinrike vors an deen zide Ende laurens ende arnoud Jans scupers kindre an dandre ziin verdeelt in der manieren hierna volghende dats te wetene dat katerine ende hare kindre vors zelen hebben tvurste huus ende erue dat meester jan lieuins was staende te pamele op den spey naest michiels riken Ende laurense vors blijft dachterhuus ende erue toten naesten pale Ende van den zeluen pale achter waert zelen katerine Ende hare kindre hebben derue toten andren pale behouden dien dat de wech toter gracht blijft ghemeene Ende derue tusschen beede den husen ghelijc dat voren gheweest heeft tote nu de wijngaert blijft ghemeene Ende laurens en mach ziin achterhuus vors niet voerder voertweer 1 husen dant nu staet de Rente diere vte gaet zelen zij ghelden alf ende alf Ende omme de meerre versekerthede so heeft hem laurens vors wel ende wettelic ontheruet met voochde van den vors vursten huse ende erue Ende katerine ende hare kindre vors zijn re jn gheheruet Ende mits desen so heeft de vors katerine quite ghescolden Ende schelt quite met voochde alt goet erue ende cateyle dat hare ende haren kindren comen Ende versteruen mach van janne den cupre haren vader Ende al dat hier vors es dats ghedaen bi wille ende consente van Schepenen
</main>
<end>
Orconde der gillis van der gillis cabbeliau der gillis van der crayen Ende der jan van den boengaerde alse Schepenen jn audenaerde Dit was ghedaen jnt jaer ons heeren mccclxiiij den twalefsten dach van meye
<end>
1 supralineair "t"