Compilatiecorpus Historisch Nederlands 1.0 (CHN): ambtelijke teksten 1250-1800: oudenaarde_1368_1

<begin>
Dat moeten weten alle die siin ende zelen siin
</begin>
<main>
dat jehane van der mersch jacop [cro]ps wedue heeft ghegheuen ende gheeft bi goeder verzienicheden naer haren liue pietren van huerne michiels zone ende willem den zeluersmet ofte welken dat bringhere zal siin van den brieuenteele v lb groeten [tor-no]ise vlaenderscher munten om bestedene naer haren liue ouer hare ziele alsoe sou hem lieden met monde gheseit heeft sonder iemene der rekeninghen te doene Ende ware soe dat jehanen oer 1 ofte andere hier af belet daden ofte werden van gheuen in wat manieren dat ware waert in deele ofte in al soe hee[f]t jehane vors dat sou dan sculdich ware dan vors perzoenen ofte welken van hem beeden vors dat bringhere soude siin van de brieueteele vij lb gro tornoise munte vors van goeder loyaler scult te gheldene ten wille van hem lieden om alt selue mede te doene dat vors es Ende dit heeft ie[hane] vors bekent ende bewijst met voghede op alt goet dat sou heeft ende hebben mach
</main>
<end>
Orconde der arnoud hoene ende der goessine cabeliouwe alse sc[epenen] in audenaerde Dit was ghedaen int jaer mccc ende lxviij den vij sten dach in septembre
</end>