Compilatiecorpus Historisch Nederlands 1.0 (CHN): ambtelijke teksten 1250-1800: oudenaarde_1370_1

<begin>
Dat moeten weten alle die siin ende selen siin
</begin>
<main>
dat Rase veldekin van thielt heeft ghegheuen ouer sine hele den hospitale van audenaerde xl sc par siaers Erfelike renten om mede te doene int vors hospitael jaerlijx sine iaerghetiden Ende bi manieren dat de zustren van den vors hospitale sullen hebben jaerlijx ten daghe van den vors iaerghetide te petanchen deene xx sc par vors Ende diere gheliken de zieke dan ligghende int vors hospitael dandere xx sc par vors Ende dese vors xl sc par heeft der inghel brune ende den vors rasen veldekine beset ende bewijst jaerlijx te sente baefs daghe gheldende erfeleke durende op eruachteghede binnen vrieheden van audenaerde hier naer volghende dat es te wetene deene xx sc par vors op thuus ende therue dat jan scupers was tusschen lodewijx van den boemghaerde ende jans van den bossche in de neder strate ghenouch bi den steenputte ende dandere xx sc par vors op een sticke lants op thof lant dat jacops van ghent es Ende van desen vors xl sc par siaers erfeleke renten zoe heeft hem de vors Jnghel brune wel ende wettelike ende met voghede ontherft sfor hospitaels bouf om mede te doene jaerlijx sfors raes iaerghetiden in alder manieren dat vors es
</main>
<end>
jn kennessen van waerheden soe hebben wij der jan de visschere ende der jan van der sicclen dese presente cyrographien elc ende elc gheseghelt met sinen propren zeghelle vte hanghende alse scepennen in audenaerde in desen tijt dit was ghedaen int jaer van gratien alse men screef mCCC ende lxx in de maent van Octobre
<main>