Compilatiecorpus Historisch Nederlands 1.0 (CHN): ambtelijke teksten 1250-1800: oudenaarde_1378_1

<begin>
kont ende kenlijc sij allen lieden
</begin>
<main>
dat Dierlay van den Wincle ende jonfr jane siin wetteleke wijf alse met haren wetteleken vooght hebben onderlinghe bi ghemeenen consente gheordineert ende ghemaect ende haer kindre ghegoed naer de doot van hem beeden met versienicheden in der manieren dat hier naer volght Dats te wetene dat dierlay haer zone jan ende jonfr katerine haer dochter sullen siin ende bliuen ter achterster Doot van den vors dierlaye ende jonfr janen sinen wetteleken wiue euen goede kindre jn alt goed daer vte dat dierlay ende jonfr jane vors versteeruen sullen sonder dat tleen v bunre j vierendeel groet sal moeten gaen aldaert sculdich es te gane op doutste oer mids dat jonfr katerine tvors dierlays ende jonfr janen dochter in moet bringhen toete vijftech pond gro torn vlaendersche munten de welke hare ghegheuen waren in voermen van wetteleke huwelike met pietren van steenhuuse haren wetteleken man ende altoes enen goede bundre sijnde ter achterster doot sonder fraude ende malicie ter goeder trouwen Wel es te wetene ware alsoe dat dierlay jan of jonfr katerine of pieter haer wetteleke man ende voecht jeghen dese ordinantche staken of daden steken in eenegher manieren ende dese ordinantche niet en hilden welc dat dade van dierlaye janne of 1 katerinen of van haren wetteleken voeght die ware ghehouden in eene zekere scult van vier hondert pont gro torn daer af deen vierdendeel minen heere van vlaendren dander den bisscop van camerike terde der poert ende scepennen van audenaerde ende tvierde vierdendeel partien die dese ordinantche wel hilden nochtan moeste al dat hier vors es bliuen goed ende wel ghehouden in al der manieren ende condicien ghelijc dat voren verclaert ende mids deser cyrographien so siin alle andre ghescrijften in wat manieren dat sij ghemaect siin al te nieute ende quite ende van gheenre weerddre ende in deser manieren hebbene dierlay ende jonfr jane vors alse met dierlaie haren wetteleken voeght gheloeft ende bewijst te heffene ende te jnnenne op al tgoed dat sij hebben of hebben mueghen
</main>
<end>
jn kennessen ende in orconscepen der waerheden hebben wij jan cabbelliau F mijns heeren jan de vissere ende pieter van alse scepenen in audenaerde dese presente cyrographie gheseghelt elc onser met sinen segle vuthangh dit was ghedaen jnt jaer ons heeren doe men screef mccc lxxviij in sente maerx daghe ewangheliste
</end>