Compilatiecorpus Historisch Nederlands 1.0 (CHN): ambtelijke teksten 1250-1800: oudenaarde_1387_1

<begin>
kenlijc zij allen lieden
</begin>
<main>
dat jan van der haghe wauters van der haghe zone was Ende marie van auteghem vor wetteleken huweleke ende in vormen van wetteleken huweleke hebben elc andren ghegheuen ende ghedreghen gheuen ende draghen wetteleke bj voeghde elc op andren ghelijc ende in al der manieren dat hier naer verclaert staet dats te wetenne gheuielt dat jan vors eer voere van liue ter doet dan marie vors dat dan marie vors soude bliuen behaudende ende bezittende alt tgoed heruen ende catteylen hoe ende waert gheleghen soude zijn waert binnen der vrijheden van audenaerde ofte der buten dat zij te gader bezeten zouden hebben niet vte ghezondert haer leuen lanc alle de bladinghen der af hare te hebbene Ende der in alderzeluer manieren gheuiet dat marie vors eer voere van liue ter doet dan jan vors dat dan jan vors soude moeten bliuen behaudende ende bezittende alt tgoed heruen ende Catteylen hoe ende waert gheleghen soude sijn waert binnen der vryheden van audenaerde ofte der buten dat zij te gader bezeten souden hebben niet vte ghezondert sijn leuen lanc alle de bladinghen ende de prouffiten hem der af te hebbene Ende dit oec in diere condicien ende manieren dat de lancxt leuende van janne ende marien vors niet ne sal moghen vercoepen nochte bezwaren gheene eruen toehoerende den ghenen diere voren ghevaren ware van hem beeden vors van liue ter doet nochte dat de lancxt leuende de Catteylen die naer de Catteylen die naer sine doet bliuen zelen dat hij die niemenne ne sal bj ghiften moghen gheuen maer de lancxt leuende van janne ende marien vors mach de Catteylen vercoepen ende verteerren op dat hijs ghebrec ofte noet heeft Ende so wanneer ende so varinc dat de lancxt leuende van janne ende marien vors gheuaren sal zijn van liue ter doet dat dan alle de Catteylen so wat catteylen dat zijn moghen die naer den lancxt leuende van hem beeden vors bliuen selen Ende voert alle de heruen die jan ende marie vors te gader ghecocht mochten hebben dat die zelen moeten gaen ende versteruen deene heelt op doer van jans ziden Ende dander heelt op doer van marien ziden Ende alle de ander heruen zelen moeten gaen ten hoyre ende ter ziden van dat zij commen zijn Ende jan ende marie vors zelen moghen harer beeder Eruen vercoepen op dat hemlieden ghelieft also langhe als zij beede leuende zijn voert ware alsoe dat hiement quame van scgheens hoyre van diere voren gheuaren sal zijn van liue ter doet van janne ende marien vors welcx hoyr dat ware die jeghen dese vorseide ordinnantsen ende goedinghen ghinghen staken ofte daden steken fuuten frauden zochten in Eenigher manieren in deele ofte in al te wat wetten dat ware waert met spiritueel waert met temporeel so verkennen jan ende marie vors al nv den lancxt leuende van janne ende marien vors dan macht te hebbene eene wetteleke schult te jnnene ouer de vors ordinnantse ende goedinghe van iijc 1 lb par vlaenderscher munten op alzulc goed als naer hem bleuen ware van diere van janne ende marien vors ghevaren ware van liue ter doet zonder den lancxt leuende van janne ende marien vors hiet vermindert te wesenne dan van haren rechten deele naer de vryhede van audenaerde Ende dat hier vorseit es ende vorscreuen staet van pointe te pointe dat hebben jan ende marie vors elc ouer hemlieden ende haerlieder hoyr ende naercommers vor wetteleken huweleke ende in vormen van wetteleken huweleke ghelooft bewijst ende bezet wetteleke elc met voeghde op hemlieden ende voert op alt tgoed dat zij hebben ende hebben moghen hoe ende waert gheleghen es eist binnen der vryheden van audenaerde ofte der buten
</main>
<end>
jn kennessen ende orconschepen der waerheden so hebben wij jan de busschere Ende jan van heestert alse schepenen in audenaerde dese presente cyrographie ghezeghelt elc onser met sinen zeghele Dit was ghedaen den .xvj. sten dach van laumaent jnt jaer ons heeren als men screef mccc ende lxxxvj
</end>