Compilatiecorpus Historisch Nederlands 1.0 (CHN): ambtelijke teksten 1250-1800: oudenaarde_1388_1

<begin>
kenlijc zij allen lieden
</begin>
<main>
dat gillis de meyere heeft ghecocht jeghen mergrieten gillis gadermins wedewe een herue metten kateilen diere op staen ligghende te pamele op de schelde daer men gaet ten hamme waert dat men seid de tichelrie tusschen mergrieten huse ende herue vorseid an deene zide ter kerken waert van pamele ende jacops correelmakers huse ende herue an dandre zide ten hamme waert Omme iiij sc ende ix d gro torn vlaenderscher munte Elx siaers erfeliker Renten der vte gaende 1 Ende op dit vors herue so moet gillis vorseid binnen desen zeluen jaere een hws doen zetten dat wert moet wesen iij lib gro torn munte vorseid Ende mids desen so heuets mergriete vorseid ghewuerpt ende hare ontheerft van desen vorseiden herue ende gillise vorseid der jn gheerft wel ende wettelike ende ghelooft waerscap jaer ende dach na wet vsage ende costume van der vriheden van audenarde ende van pamele
</main>
<end>
jn kennessen der waerheden So hebben wij fransois crupenninc coelaerd loedemare ende Oliuier van alse schepenen in audenaerde dese presente cyrographie ghezeghelt elc onser met zinen propren zegle Dit was ghedaen jnt jaer ons heeren als men screef xiij ende lxxxviij den xiiij sten dach van aprulle
</end>