Compilatiecorpus Historisch Nederlands 1.0 (CHN): ambtelijke teksten 1250-1800: oudenaarde_1390_1

<begin>
Kenlic zij allen lieden
</begin>
<main>
dat Gillis crupenninc Ende Jonf kateline ziin wetteleke wijf gheuen ende hebben ghegheuen ter Eeren van gode den Ospittale van Onser vrouwen taudenaerde thuus ende erue dat men heet den stheen van Jnghelant bachten der kercken taudenaerde den vorseiden Ospittaele hant der an te slane stappennants naer dat mijn Jonfrouwe de wedewe van franssoise van miins her Jacops dochter van Eemsroden was gheuaren sal ziin van liue ter doet met al den rechte gillis ende jonfrouwe katelinen vors hadden ghelijc ende Alsoe sijt cochten Jeghen Jan bloocs oer sonder gillise ende jonfrouwe katelinen vor of haren oere ende naercommers nemmermeer Jet der an te hebbene ofte te verhaellene Ende eeuweleken der vorseider ospitale te bliuenne Ende gillis ende jonfrouwe kateline vor met hem alse met haren wetteleken man ende voeght hebben hemlieden van der vorseider huus ende erue wetteleke onthuut ende ontheruet Ende doe was der gillis mondekin alse Caeppellaen mier vrouwen der Priheusen ende haren zusteren jnt vorseide huus Ende erue wetteleke met voeghde gheheruet te vorseiden hospittale bouf Ende gillis ende Jonfrouwe kateline vor hebben belooft den vorseiden der gillis mondekine in den name van den ospittale vor van den vorseiden huus ende erue te doenne waerscheep jaer ende dach naer costume ende vsaedze van der vryheden van audenaerde
</main>
<end>
Jn kennessen ende oerconschepen der waerheden So hebben wij jan de visschere meester jan van der meere Ende daneel van clesserenaere Alse schepenen in Audenaerde dese presente Cyrographie ghezeghelt elc Onser met sinen zeghele dit was ghedaen op den xxiiijsten dach in ougstmaent jnt jaer ons heeren als men screef mccc iiijxx 1 ende tienne
</end>