Compilatiecorpus Historisch Nederlands 1.0 (CHN): ambtelijke teksten 1250-1800: oudenaarde_1521_1

<begin>
</begin>
<main>
Omme tgroote ghebreck dwelck ter kennesse van heere ende wet vander stede van Audenarde ghecommen es inder maniere ende usancie vander inninghe van schuldelicken ofte civilen zaken alsoe wel van rauwen ofte ombewetteghe zaken ende schulden als in execucie te doene omme inninghe te vercrighene van wettelicke bekende ofte ghewysde schulden ende oec achterstellen ofte ghevallene paymenten van renten ende dat by ghebode in tghuent dat men niet gheuseert ofte ghecoustumeert gheweest en es de gheboden te moghen doene up schuldenaers ofte debiteurs van [by] procuracien het en waere van cloesters ofte godshusen ende van weesen nemaer alle andere crediteurs ofte schultheesschers de gheboden te moeten doene by den amman ter kennesse van scepenen ter presentien ofte personele comparutie vande voorseide crediteurs ten anderen in tghuent dat men oec niet gheuseert en heeft inninghe ende execucie te vercrighene van achterstelle ofte verloep van renten het zy van lyfrenten ofte van eerfelicke renten niet gheypotequiert wesende up eenich expres besedt by pandinghen van catheilen alzoe men andere wettelicke bekende ofte ghewysde schulden innende es hoewel nochtans de debiteurs schuldeneers ofte emmers de vercoopers ende borghen der voornoemde renten byden constitucien vanden lettren danof wesende wettelic ghecolligiert gheobligiert staen ende verbonden huerlieder persoenen ende al huerlieder goet de zelve rente te betaelene ten daeghen ende paymenten verclaert inde zelve renten ende anderssints
So es omme daerinne te voorsiene ende de voorseide ghebreken te remedieerne ende ter vervoordernesse van justicien by eersaemen ende wysen Jan van Seclyn Jacob Illoirs ende huere ghezellen scepenen nu wesende der selver stede by advise vanden goeden lieden vanden raede ende anderen goeden mannen der selver stede ende by consente van edelen ende waerden heere mer Alexander van Vaernewyck ruddere heere van Borst als hoochbailliu der voornoemde stede ende castelrie van Audenaerde gheordineert ende ghestatueert allen crediteurs te moghen userene vanden pointen ende articulen van statuten ende ordinancien als hiernaer verclaert werden ende dat niet jeghenstaende alzulcke coustumen ende usaigen alsmen in contrarien van desen naervolgliende articlen ende pointen van statuten ende ordinancien zaude moghen allegieren ende prouven
Alvooren dat men sal vermoghen van nu voortan te doene ghebiedene byden amman ter kennesse van scepenen der voornoomde stede alle ghediede schuldenaers van rauwen schulden by procuratien ende alle andere van wettelicke bekende ofte ghewysde schulden ofte zaken
Item ten anderen men sal ooc inschelycx moghen doen ghebieden by procuratien de vercoepers ende borghen indien faulte ofte ghebreck waere ande vercoopers voor achterstellen ofte verloepen van renten hoedanich die wesen also wel van erfelicken renten als van lyfrenten evenverre dat de vercoopers ende huere borghen vander selver renten inde lettren van constitutien der zelver rente in actien personnele verbonden staen hueren persoen ende al huerlieder goet gheobligiert hebben die te betaelene
Ten derden dat de acteur ofte crediteur van renten het zy van lyfrente ofte van erfelicke rente evenverre dat de vercoopers ende huere borghen in actie personnele verbonden staen ghelyc breeder verclaert is int voorgaende article zullen oec vermoghen indient hemlieden goetdinct omme inninghe te vercrighene van achterstel van renten ofte ghevallene payementen te procedeerne upde debiteurs ofte borghen indien faulte ofte ghebreck waere anden vercoopere by pandinghen te doene up huere catheilen ter letterine van scepenen ende daernaer by vercoepinghe van huerlieder goedeinninghe vercrighen alzoe men van anderen wettelicken schulden gheuseert es te doene
Item ende alwaert zoe dat byden lettren van constitucien van renten het zy erfelic ofte lyfrente bleke expres besedt ofte ypoteque ghedaen zynde vander selver rente daerinne verclaert so zullen dien nietjeghenstaende de crediteurs ofte crediteur evenverre dat de debiteurs ofte vercoepers van renten in actien personnele gheobligiert staen zoe voorseit es verbonden hebbende huren persoen ofte huerlieder goet vermoghen te procedeerne [by] ghebode ofte pandinghe zoe boven verhaelt es Behauden dies dat de acteurs ofte crediteurs gheheel staen zullen te moghen procedeerne by afwinninghe daer expresse ypoteque ofte besedt es
Item zullen oec de crediteurs moghen procederen by beryde voor achterstel van erfelicke renten alsoe wel als van lyfrenten ende ten zulcken salaris ende coste alzoe men dat van lyfrenten naer aude coustume ende wet vander poort gheuseert gheweest es te doene
Item ende zullen de crediteurs ofte de crediteur ter kuere staen by welcken weghe ofte middele boven verclaert die zy zullen willen kyesen ofte willen procederen omme best ende eerst inninghe te vercrighene vanden zaken boven verhaelt ende ghenarreert
Item zullen oec de zelve crediteurs ofte crediteur by den eenen weghe gheprocedeert hebbende danof vermoghen te scheedene ofte dien laeten vaeren betaelende de costen danof ghebuert ofte ghedoghen ende weder van nyeus by eenich vanden weghen poincten ofte middelen boven verhaelt procederen ter inninghen van hueren schulden zoe voorseit es altoes scheedende vanden eenen betaelende de costen vanden anderen boven verhaelt
Item ende als vanden renten het zy erffelic ofte lyffelic daer de debiteur byden lettren van constitucien vanden zelven renten huerlieden gheobligieert hebben beteren zekere te doene ofte de zelve renten te besettene up eenich expres ende souffisant besedt ofte ypoteque binnen den tyt inde selve lettren verclaert ende dat de vercoepers ofte debiteurs danof in ghebreke waeren so zullen in dien ghevalle de voornoemde crediteurs vermoghen te procedeerne indient hemlieden goetdinct by ghebode upde debiteurs oft by pandinghen up huere catheilen daer verclaers van personen es doer vercoepinghe van hueren catheilen alsoe men andere wettelicke schulden innende es ende vercrighen inninghe ende betaelinghe alsoe wel vanden principaele als vanden achterstellen vanden selven renten by ghebreke van beteren zeker ofte expressen bezette als boven verclaert es
Es oec gheordineert ende ghestatueert dat hem elc van nu voortan verdraeghe eenich huus ofte erve binnen der stede ofte hare vryhede staende ofte ligghende int vercoepen ofte alieneren eeneghe renten den coopere te verzwighene
Item ende van ghelycken zyn huus ende erve met renten belastende ofte rente daerup vercoepende dat de vercoepere van renten de voergaende renten up tselve huus ende erve besedt ofte gheypotequiert zynde schuldich werdt zynen voorseiden coopere van renten die alvoren te verclaerene ende inde lettren vanden coepe vanden zelven huse ende erve ofte vande verachter[de] rente die de vercoepere doende es te doen narreerne ende stellene wien de rente toebehoorende es Ende zo wat vercoepere het zy van huusen erven ende van renten bevonden werdt dies in ghebreke ghezyn hebbende ofte ter contrarien ghedaen hebbende so zullen zulcke vercoepers ofte vercoepere verbueren de boete van vichtich ponden parisis deelende in tween deene helft ten proffite vanden heere ende dander vander stede ende voort van frauden ende loesheden ghepuniert te werddene het zy by banne ofte anderssints arbitrarelic ter discrecie van scepenen het en zy dat yement voor de date van dese ordinancie statute ofte edicte anderen zyn huus ofte eerve gheleent ofte ghecousentiert hadde in zekere te stellene in dat cas zaude de vercoepere vanden huus ende eerve ofte renten ontstaen hem by eede te moghen purgierne ende te verclaerne niet indachtich omme de lancheit van tyde gheweest hebbende int vercoepen vanden huuse ofte renten datte gheleent ofte ghebandt hebbende Ende datte alsoo by eede vervanghen hebbende alsdan onghehauden wesende vander zelver boete ende punicien ofte correctien nemaer den coepere gheheel staende up zyn schaede ende interest zoe die te raede vinden zal
</main>
<end>
Ghedaen ende aldus ghepublieert den xviien van maerte xve een ende twintich
</end>