Compilatiecorpus Historisch Nederlands 1.0 (CHN): ambtelijke teksten 1250-1800: oudenaarde_1528_1

<begin>
</begin>
<main>
Men ghebiedt van heere ende wetweghe vander stede van Audenaerde omme te remedieerne de questien ende differenten die dicwille tusschen diversschen lieden ende insetenen der selver stede rysen ende ghebueren ende oec den scaeden ende interesten die deen of dandere somtyts daerby hebben ter causen vanden voorwordden van huushueren als die niet wettelic bekent en staen ofte niet belooft die wettelic te doene passerene voor scepenen der selver stede ende zulckelic hueringhe als die de persoenen ghedaen hebben binnen drie maenden alsdan eerst commende te moeten verhusene niet jeghenstaende dat den tyt vander voorseide hueringhe niet gheexpireert en was hemlieden funderende up zekere costume danof voortyts gheuseert ende vonnessen danof ghewyst
So es by advise vanden goeden lieden vanden raede der voornoemde stede gheordonneert ghestatueert ende by desen ordonneren ende statueren scepenen der selver stede dat van nu voort an de hueringhen ghedaen van huusen ende eerven die binnen der selver stede ende huere vryhede staen stede hebben zullen al zyn die niet wetetlic ghestelt ofte belooft wettelic te stellene ofte passeerne ende die byden verhuerere te ghedoeghene te ghebruuckene ende ooc by den huerere te moeten ghebruucken den tyt vander voorseide hueringhe gheduerende naer voorwordde ende dat niet jeghenstaende der coustume ende sententien ofte vonnessen die danof ghewyst ghezyn hebben
</main>
<end>
Aldus ghedaen ende ghepubliert den XIIIIen van october xvc xxVIII
</end>