Compilatiecorpus Historisch Nederlands 1.0 (CHN): ambtelijke teksten 1250-1800: oudenaarde_1554_1

<begin>
</begin>
<main>
Scepenen vander stede van Audenaerde gheinformeert synde vanden quaden regimente van Adriaen vanden Bossche fs Jacobs metsgaders vander dissipatie ende dilapidatie van synen goede scepenen voornoemt ordonneren ende stellen den selven Adriaen vanden Bossche in curatelle committerende totter administratie van synen goede voor curateurs joncvr Catheryne Smoors syne moedere Jaspart de Moor synen grootheere Arent ende Willem Cabillau metgaders Raesse vanden Bossche ooms vander vaderlycke ende moederlycke syde waenof syne voornoemde moedere den ontfanc ende handelinghe van synen goede ghecommitteert es midts van huerlieder administratie scepenen huere naercommers in wette deser stede rekeninghe ende reliqua te doene dies versocht synde Ende interdiceren den voornoemden Adriaen vanden Bossche de alienatie ende vertierenghe van synen goede ende oock allen lieden dat sy niet en contracteren metten selven Adriaen up peyne van niet te proffyteren van alzulcke contracten als sy met hem voortanne doen ende maecken sullen ende voorts boven dien arbitrarelick ghecorrigiert te zyne
Ordonneren voorts allen den crediteuren vanden voorn Adriaen vanden Bossche syne schulden ende contracten den voorn curateurs over te bringhen binnen acht daeghen omme danof ghedaen te werdene alst naer redenen behooren sal
</main>
<end>
Aldus ghepublieert ter poyen vander stedehuuse deser stede ende voorts gheordonneert Arent de Cuupere alias De Beer als roupere deser stede tvorseide te roupene ende publierene metter belle ten vier houcken deser stede ten hende dat nyemande ignorantie en pretendere Den viii octobris anno xve LIIII
Comparerende ter lettryne van scepenen de voorn Arent De Cuupere ende doet raccordt de voorn publicatie ende uutroupynghe ghedaen hebbende inder vormen als voren ende ten daeghe voornoemt Actum als boven
</end>