Compilatiecorpus Historisch Nederlands 1.0 (CHN): ambtelijke teksten 1250-1800: oudenaarde_1556_1

<begin>
</begin>
<main>
Dezen XVIIIen in augusty anno XVe zes en vyftich zo was by scepenen ende raedt deser stede van Audenaerde gheconcludeert ende ghesloten dat men van nu voortanne de officien te weten vande drye secretarissen van scepenen ende twee vanden vooghden vander stede voorn vallende in handen van scepenen byder aflyvicheyt vanden ghenen die de zelve bediende zullen ghegheven werden byder Wet ende by advyse vanden raede voorn ydoene bequaeme ende ghequalificeerde persoenen liberaelyck omme de ghevachierde staeten te bedienen anders [niet] dan dat zy ghehauden werden te ghevene alzulcke eene recoignoissance als zy scepenen presenteren zullen zonder dat zy hemlieden metter zelver recognoissance ofte ghifte in eenigher manieren behelpen zullen noch dat zy ter causen voorscreven zouden moghen pyckelen ofte voetsele nemen de zelve te vercoopen ofte in eenegher manieren te alieneren nemaer zullen ghehauden zyn te vulcommene dat hiernaer volght
In den eersten dat zy heere ende Wet up eedt wel ende ghetrauwelick diligentelick ende onderdanelick dienen zullen want in alzoe verre zy bevonden waeren contrarie ghedaen hebbende ofte doende in dat gheval zoe reserveren scepenen hebbende tadvys van den raede voorn ende anders niet de zelve van huerlieder staet te moghen priverene ende andere in huerlieder stede te stellen
Item ne zullen moghen hemlielieden ontmaecken vande zelve staeten tzy by ghifte vercoepinghe mangelinghe ofte alienatie ende generalic in gheender manieren eenighe baete vande zelve officien ontfaen nemaer zullen ghehauden werden indien zy [hem] [van] huerlieder staehtn ontmaecken willen de zelve staeten naectelick over te ghevene in handen van scepenen omme by hemlieden met advyse vande ghene vanden raede daerinne te voorsiene zoot behooren zoude
Item ende indien zy bevonden waeren contrarie ghedaen hebbende als hebbende eenyghe ofte andere baete ter causen van heurl renonciatie ontfaen zal de voors baete commen ten prouffyte vanden ghemeenen aermen deser stede ende de beloften ter causen voorscreven ghedaen [zyn] nul negheene ende van onweerden
Item dat de zelve niet en zullen moghen eenighen anderen staet ofte staeten te hebbene ofte bedienen dan heurlieder staet midts dat scepenen wel kennelyck es dat de voorn officien moytelick ende lastich ghenouch zyn
Item zullen de zelve ghehauden zyn continuelick te residerene binnen deser stede ende van hier [niet] te vertreckene met heurlieder woonste zonder den expressen consente van scepenen ende indien zy contrarie deden zouden incurreren de peyne van privatie van heurlieder officien ter discretie van scepenen voornoemt
Item als aengaende alle andere staeten ende officien deser stede als presentmeesterscip stedebootscip poortsluyterscip voochdencnaepscip ende dierghelycke vallende in de handen van mynen heeren scepenen midts der aflivicheyt vander ghene die de zelve bedienden zullen liberaelick bevinden zal der ghemeene welvaert deser stede nootsaeckelick wesende
</main>
<end>
Actum als boven
</end>