Lijst

Compilatiecorpus Historisch Nederlands 1.0 (CHN): ambtelijke teksten 1250-1800: velzeke_1249_1

<begin>
Descepenen van bochouta quedden alle degene die dese lettren sien selen in onsen here Si maken bekent die nu sien ende die wesen selen Ende den scepenen van velseke teuoirst
</begin>
<main>
dat der boidin molniser van dallem vercochte den hare henricke van den putte portere van ghint ii 1/2 bunre lans de rode met xx voeten dat lant leit tuschen den ghintwege ende sinen us op soe welc ende soet derhenric kisen wille Dat lant wercochte hii teuulre wet bi meier ende bi scepenen dat lant heft hij geloft tequitene met i halster euenen ende ix d bunre van alre quorelen sonder de godes tinde chegen alle die ghene die te dage ende te rechte willen comen Dat selue lant dat hijr genomet es dat heft hij boidine molenisere weder gegeuen terfleken pachte ombe i mudde tarwen ende ombe ii capone siars die tarwe teghint bennen den iiii porten teleuerne dar derhenric wille bennen ii d debeste ende bi der mate van ghint Dese tarwe es hi sculdech alrehelegermesse ende ont hir ende metwintre vergouden tesine gebrake hem hir af soe sloge derhenric sin hant ane lant ende hilt alse sin herue Dese rente die ute desen lande gaet die moet quiten der boidin ende sin afcomende ofte so wie so lant houdende es ouer den hare henricke soe dast der henric negene scade enebbe no sin afcomende Wi en hebben selue negenen segel Scepenen van velseke van onsen ouede bidi dat wit vor hem bekenden hebben si ons haren segel gelenet war si ne donre nemmeer toe
</main>
<end>
Dese voruuorde was gemaket anno domini m cc xl ix in maio
</end>