Compilatiecorpus Historisch Nederlands 1.0 (CHN): ambtelijke teksten 1250-1800: velzeke_1257_1

<begin>
T Allen denghenen die dese letteren selen sien de lantscepenen van velseke godhouden in vnsen here Wi maken v condegh
</begin>
<main>
dat dabt & conuent van Niniue hebben ghecoht terwet ene hofstat met allen gheleghen te Bochoute bouen hare hof ane de strate jeghen Hughen ende Segheren de welke hofstat de uorgheseiden Hughe ende Seghere hadden ghecocht terwet jeghen arnoude den smet van Bochoute Ende ombe dat arnout de smet hadde en wif doe hi dat goet biaghede ane den here van gauera van der welker hi heuet en kint dat na de wet es sculdech te delene ane dat goet bi dien dat si porteren waren doe si dat goet biagheden ende dat kint niet nes comen te sinen jaren soe dat het dis goets mach worpen ter wet Soe heuet deuorgheseide Hughe ende Seghere sin gheselle vor ons gheset den abt ende den Conuente en halph bunre lands dat leght jn lettellen drisch quite ende vri van alre bewisenessen ende van alre calangen ocht dat sake ware dat deuorgheseide Hvghe ende Seghere niet en brachten Arnouts kint te wetteleker worpinghen van dien gode binnen enen jare na dat kint veriart ware dat dabt endet Conuent van dien halbunre lants mochten doen hare urome als met andren haren gode tote der wilen dat si dat kint brachten terwettelleker worpinghen alsoe ghset alsi hebben ghelouet Ware oec dat sake dat kint storue jer het quame te wetteleker worpinghen soe mochte Hughe ende Seghere van din halbunre lans dat dien van Niniue es bewist haren wille doen al si daden jer sijt bewisden dien van Niniue
</main>
<end>
Ende ombe dat dese vorwarde vast bliue ende ghestade soe hebbe wi dese letteren ghegheuen den abt van Niniue enden Conuente gheseghelt met onsen seghele Dese vorwarde was ghemact vor ons ende vor vele goder lide te velseke Sdonderdags vor de gheborte sant jans baptisch Jnt jar na de jncarnatie ons heren M CC Quinquagesimo Septimo gheselt
</end>