Compilatiecorpus Historisch Nederlands 1.0 (CHN): narratieve teksten 1575-2000: holland_1619_vanderplasse_2

<titel>
Meulenaar
Den drucker tot den leser
</titel>
Vermidts ick VE konst-gierighe ende lust-lievende Leser weet seer ghe- neghen te wesen tot de lessen ende ghedichtselen des E seer vermaerden Rymer Gerbrant Adriaensz Brederode salig diens wercken ick alle met ziin eyghen handt gheschreven niet sonder groote moeyten ende diere kosten hebbe by een versamelt Iae een yegeliick by wien ick ziin schriften vondt de selve als uyt de handen ghebroken arbeydende omme die nae hunne weerde op het cierliickste VE goetwillighe Leser op te dragen Zo is daer noch eene geweest die desen mynen ernst ende vliit niet aensiende heeft aen geleydt dese kluchte genaemt den Molenaer te drucken naer een seker slordich uytschrift als bliickt by vele woorden jae halve ende heele reghelen  daer in uyt-ghelaten ende verandert die niet weynich den rechten geur ende  eyghen sin van des Dichters soete spreucxkens en quetsen Stekende daer en  boven VE het selfde zoo naeckt ende bloodt als een vondeling sonder eenich voorschrift op ziin boers inde handen Daer dit doch meer als ghene  zyne andere wercken om der velen misduydinghe VE billiick ooghe ende verschooninghe van doen is Wes halven ick my ghenoechsaem voor genoot-saeckt hiel soo dese als oock zyne andere kluchten vande Ghestolen Koe den Quacksalver ende Symon sonder Soeticheyt te geliick op het bequaemste nu in suyveren druck te verhaesten dat by avontueren niet weder een ander kome als de haen over de kolen loopen mis handelende zyne voornoemde andere  kluchten als desen jeghenwoordighen gedaen is VE vriendeliicke Leser daer en tusschen met een onvol-maect ende slordich werck payende Neemt dan  in danck seer beminde Leser desen mynen arbeyt ende wilt met u goet-gunstige oordeel dees kluchten ten rechten duyden sy is gheriimt in t groenste van ons Dichters leven Men houdt dat dit inder daedt alsoo voor- maels hier soude gheschiedt ziin oock noch wel soude kunnen ghebeuren Vint ghy onder wylen in t lesen eenighe oubollighe woorden neemt die niet  als van onsen Rymer maer van sodanighe personen in sulcken ghevalle ghesproken welcke maniere van doen ende segghen hy voor yeder een ten toone steldt jae soeckt te schavotteren ende voordacht te maken Zoo doende  sult ghy voortaen een beter ghevoelen hebben van dergheliicke spelen Ende is daer doch evenwel een steentjen daer VE hem aen mochte stooten wilt doch dat wyseliick om beters wille ter zyden treden t Welck wenscht ende bidt
VE dienstwillighe
C Lodowijcksz vander Plassen