Corpus Van Reenen-Mulder (CRM14): Oorkonde C108p37302

@ Wi , borghermeestere ende raed van Groninghen , doen cundich allen luden met dessen openen brieve , dat voer ons quam Ludekiin Sconedroch ende becande , dat hi hadde vercoft dre ende thuintich amerzaten ende zoven roeden landes Ludekine , Ghyselen manne Wattens , voer ene summe van ghelde , de Ludekiin vors_ vol ende al betaelt is . Ende dese voers_ dre ende thuintich amerzaten ende zoven roden droech Ludekiin Sconedroch voers_ op Ludekine , Ghiselen man voers_ , met allen rechte ende met allen eyghendome , vri ende quite , eweliic to bruken ende to bezittene . Van desen voers_ lande is gheleghen dertiend + alf amerzaet op den Zuutesche op de westerziit van den cruce , daer Rande Lewens erve op de noerttziit leghet , ende dre amerzate ende thue roeden bi Hylighen Gheestes merc , daer der personaet land op de noertziit gheleghen is , ende sest + alf amerzaet , daer Evart Calmer met sinen erve naest gheleghen is op de zuutzide , ende Alards erve Aminghe , dat op de noertzide leghet , ende thue amerzaet ende thue roeden , de gheleghen siin op de oesterzide van Kempkenberghe , daer een wech en~tusken ghaet , daer Henric Evardes soen met sinen erve op de nortzide gheleghen is . Dat orcunden wi met onser stad zeghele . Ghegheven int jaer ons Heren dusent dre + hondert dre ende zoventich op sinte Victoers dach , do Herman Catere , Lubbert Sickinc , Gheert Lewe , Otte Polleman , Wijcbolt Maurissinghe ende Wijcbolt Evardes soen borghermeestere waren onser stad .