Corpus Van Reenen-Mulder (CRM14): Oorkonde C608r38301

@ Wi , rechters ende mene meente van Fyvelghelande , doen cundich allen luden met desen openen brieve , dat wi eendrachteliken ende met goeden ? rade , om nutticheyt onses landes siin overdraghen ende loven in goeden trouwen in desen open breve stede ende vaste to holdene den vrede , den de stad van Groninghen ende Hunzeghelant tozamen begrepen ende bezeghelt hebben , in al den ghevoghe ende in alre maniere alse de brief holt ende begrepen hevet , daer dese jeghenwordighe brief doer + ghetoghen is . In orcunde der waerheyt so hebben wi onses menes landes zeghel eendrachteliken an desen brief ghehanghen . Ghegheven int jaer ons Heren dusent dre + hondert thue ende tachtich op sente Martiins dach in den wynter .