Corpus Van Reenen-Mulder (CRM14): Oorkonde C608r39403

@ Wy + , Bertolt Buninghe , Ludelef Lanchenne , cureyt van sente Mertens + kerke , ende Johan Everdes , provisoer van den Hilghen Gheeste in Groninghen , bekennen ende betughe mit dezen openen breve , dat vor ons is ghekomen her Otto Folkerdinc , cureyt van onser Vrouwen + kerke in Groninghen vors_ ende betughede dat by siner consciencie , dat hem dat witlich ende kundich was , do Johan de Vos , Henrich Polman ende Gherd Hoptes hadden ghevanghen Folne ende Harke Lippema uet Achtekerspel , dat zie de venghen buten den rechte ende buten der stad plicht van Groninghen . Ende dat ghelt , dat zie hem afschatten , dat hie dat mede betaelde van Folnes ende Harken weghen Johanne , Henrike ende Gherde vors_ to Rolde in her Alives spiker van Rolde , ende dat daer negheen ghelt van en bleef in der stad van Groninghen . In orkunde so hebbe wy , Bertolt , Ludelef ende Johan vors_ , onse seghele an dessen breef ghehanghen . Ghegheven int jaer ons Heren M CCCXC IIII up sente Bartholomeus + dach .