Corpus Van Reenen-Mulder (CRM14): Oorkonde C608r39901

@ Wy , borghermestere ende raet van Groninghen , ende ghemene rechters ende meente der lande van Vreesland , de gheleghen ziin tuschen der Emeze ende der Lauwerse , doen kundich allen lueden met dezen openen breve , dat wy ziin verdraghen met Elde Gockinghe , hovedinghe to Oesterbroke , van alre schelinghe , de wy met hem ghehad hebben vor dezen daghe to , in dezer manyer . Hevet jenich man met rechte up hem to spreken , den sal hie recht ende bescheet doen by onsen woerden na landrechte . Ende weert sake dat Elden vors_ daerenboven jenich man veronrechten wilde , dat sulle wy hem helpen keren ende wederstaen na onzer macht . Sunder al arghelist . In orkunde der waerheyt , so hebbe wy borghermestere ende raet vors_ onzer stad seghel an dezen breef ghehanghen , daer ons , rechteren der vors_ lande , to dezer tiit an ghenoghet , want wy onzer lande zeghele by ons nicht en hadden . Ghegheven in den jaer ons Heren duzend dre + hondert neghen ende neghentich up sente Mycheels + avent .