Corpus Van Reenen-Mulder (CRM14): Oorkonde C647r31301

@ Ic Johan van der Ese , knape , doe cont alle denghenen , die desen brief sullen sien jof horen lesen , dat ic met vrenscap ende met willen ende met raede minre vrende overeen bin ghedraghen met Hermanne Vleisch also , dat ic minen sone Hermanne , die dochterkint is haren Engelbertes van Paitze , ridders , hebbe ghelovet ende ghesekert Lisen Hermans dochter Vleisch vorgeseghet te nemene toit enen wive alse vroe , alse min sone Herman vorgeseghet toit sine jare coemt . Voertmeer . Ende ic Johan van der Ese hebbe sekert ende lovet . in orkonde des brieves , gheseghelt met minen segele ende met segel Roelves van Paitze , mines swagers . Ende ic Roelf van Paitze hebbe ghehangen min segel an desen brief als ombe bede Johans van der Ese in orkonde alle der sticken , die hiir vorghescreven sin . Ghegheven int jaer ons Heren dusent drie + hundert ende dertiene in sente Walborge + dage .