Corpus Van Reenen-Mulder (CRM14): Oorkonde C648r35401

@ Ic , Voppa Reynaerman , make kont ende kenliic allen dienghenen , die desen brief zullen zien of horen lesen , dat ic ghegheven hebbe ende gheve met minen vrien willen ende met ghesonden live onbidwonghen ende onghebeden in rechter aelmossen dien heren van dien Duusken huse te Bonnen al miin goit ende miin erve , groet ende kleen , goit ende quaet in dier joghenwordichheyt des personers ende sire prochyane van Lewarderwolde ; des siin gheleghen vijf grase in dien ham buten~diic ende siin ghezaiet ende vier grase , die siin gheleghen op dien maden te west dien diep . Voert so love ic , dat , waer dat sake , dat ic ymmermeer van dien heren van ? Duusken huse sceyden wolde met levenden live jofte sceyde , so sal al dat goit bliven ? dier heren huse van Bonnen sonder emants anespreken van mire weghen jofte zegghen . Over dese voerscreven voerwaerde so heb ic , haer Heinriic , personer van ? , ghewesen met minen prochianem Rembert opter hemric ende Rembert , siin neve , ende Pape Houcom ende Tamme ende Grote Herman Vuuske . Ende om bede der voerscrevenner vrouwen ende mire prochyane , die over dese voerzeyde saken ghewesen hebben , want si ghene zeghel en hebben , so heb ic , haer Heinric , personer van Leverwolde , desen brief biseghelt met minen seghel . Ghegheven int jaer ons Heren dusent drie + hondert vier ende viiftich op sinte Jacobs + dach .