Corpus Van Reenen-Mulder (CRM14): Oorkonde C648r36101

@ Ic , Icbricht van Peydze , ridder , doe cundich allen luden , die dessen brief sullen zeen oft horen lezen , dat ic vor my ende miin erfghename hebbe ghedaen enen wandel van mudden , deen ic hadde over die godes ridder to Bonne , alse van Hommemangoit , der my dre mudde van aneghecomen sint , willic goit gheheten is Oldebonekinghegoit ende gheleghen is in den dorpe to Witten met allen richte , dat wy der + aen hedden ende hebben op de tijt , do ic met hem den vors_ wandel dede . Ende dessen wandel heb ic ghedaen by minen vryen willen ende om vruntscap der heren van Bonne , die op die tijt weren in den godeshuus to Bonne . In orcunde aller vorwerden ende wandels vors_ so heb ic miin seghel an dessen brieve ghehanghen int jaer ons Heren duzent dre + hundert een ende zestich des Maendaghes na Paeschenachtedach .