Corpus Van Reenen-Mulder (CRM14): Oorkonde C690r39101

@ Wy , mene lant to Westerwolde , doet kundich alle den + ghenen , de dessen bref zeen of horen lesen , dat wy mijd guden willen overdregen zin ener vasten olden vrunscap unde zone ewighe unde jumbermeer , alzo mijd Umken Rijpperdes , proveste unde hovedinch to Fijrmesen , Wyarde Memminghe , Memmen , zinen zone , Tiabeken Jelderkes , Adden , Hayen , Bolen , broderen , zelghen Eggen kinderen Addinghe , unde myd eren rechten nakomelinghen unde mijd den vorwarere des huses to Wedde van erer weghene , alzo dat wy , mene land to Westerwolde , zolen ende willet gherne gheven Memmen Wyardes zone , Adden Addinghe unde sinen broderen unde eren rechten nakomelinghen alle de broke , de wy zelghe Egghen vore ghegheven hebben , utghesproken den toln unses ghenen gudes , twe penninghe to bezetten unde twe to untzetten . Unde de hone den men sweret , de en zal den gherichte nicht gheven , unde zo zele wy gheven den richtere dre schillinghe vor de vif schillinghe , de boven de vif mark zin , dar men enen man sleyt , dat God behode . Hir + enboven zo love wy , mene lant to Westerwolde , an guden trowen dit recht to holdene unde to blyvene mijd lyve unde mijd gude to nuden unde noden by dessen vorghenomden hovedinghen , alzo ze vorescreven stan , unde eren rechten nakomelinghe . Desghelyken love wy , vorscrevenen hovedinghe unde unse rechten nakomelinghe , weder den lande to Westerwolde by em to blyvene mijd lyve unde mijd gude . Wer oech zake dat dar ghescreyet wurde en wapenrocht unde dat gerichte zochte ere viande unde unse mene lant en volghede nicht , en jewelk man solde breken vif marck unde de + ghene , de ze husede unde havede , dat men beschinen mochte , de zolde breken lijf unde gut . Desse vorscrevene zone unde vrunscap love wy , Umken , Wyarde , Memme unse zone , Tiabeke Jelderkes , Adden Addinghe unde zinen broderen unde eren rechten nakomelinghen , wy , mene lant tho Westerwolde , to holdene zunder arghelist , alle quade nye vunde utghesproken , dar desse zone mede valschet werden moghe . Hir heft an ? over ghewesen Bernt van Haren , knape , her Memme , kerchere to Unswide , her Ghert to Flachtwide , her Hermen to Wedde , Ghert de richtere , de desse zone ghemaket hebbet umme unser beyder vrunscap willen . In ene merre vestnisse desser vorscrevenen dink zo hebben wy , mene lant to Westerwolde , unse ingheseghel an dessen bref ghehanghen , unde hebbet dar + tho ghebeden her Memmen to Unswide unde her Gherde to Flachtwide , dat he zin ingheseghel heft ghehanghen an dessen bref . Datum anno Domini MCCCLXXXX primo in octava Corporis Christi .