Corpus Van Reenen-Mulder (CRM14): Oorkonde D002p32202

Jn die name gods Amen / Jc Clays die zeelander wetende mijns sins , ende Machtich mijns lijfs , by rade mijns prochghipapen hebbe ghemaket ende gheset vore mine ziele tot minen cruse te voeren ouer zee alst eene ghemeene vaert wort . vijf . hont . lants die ic cofte ieghens willame van loene / ende beleghen heuet die pape vp die zuytzide / ende Jhan floren soens kinder vp die nortzide / ende dese . vijf . hont lants ensellen in gheenre deelinghe comen na miere doet / ende beset ende beuelet / Jhanne minen zone ane te vane na miere doet / te voeren ende te vercopen alst eene ghemeene vaert wordt tot dier tijd te ghebruken , waert dat Jhans ghebrake / te comen vp heynric minen zone / van heynric vp willame minen zone / van willame vp jacob minen zone , ende vort vp den outsten ende vp mijn naesten , ende wie dit vorghenoemde erue onder heuet / die sel Jaerlix geuen vore mine ziele , also langhe alst ongheuoert is , alle goede vrydaghe . vier . achtendeel tarwen an brode den armen , ende . vier . paer scoen vp zente maertijns dach in den herfst , waert dat sake , dat si dese aelmossen niet engauen , wilc haer diet erue onder heuet vp sine voernoemder tijd , dat kenlic ware , so souden die heylighe~gheest~meesters van den zande / dit vorghenoemde erue ane~vaen , ende die aelmossen iaerlix gheuen als vore screuen staed / vort besette ic vore mine ziele toter papeliker prouen te zande . drie . scelling tiaers EEwelike staende vp den westersten camp lants van Ses campen in die corte zijtwinde , ende . drie . scelling tiaers den heylighen gheest te zande EEwelike staende vp den camp lants , naest den camp vorghenoemd an die oest~zyde , ende dese tuee campe lants in gheenre deelinghe te comen , ende heynric minen zone te ghebruken , die rente_ alle jare te betalen in die herfs zant~marct , na heynric te comen vp den outsten naest him en vp mijn naesten , Ommedat dit vaste ende stade bliue , so hebbe ic ghebeden haren gheraerde minen prochghipape dat hijt heuet bezeghelt met sinen zegle , ghegheuen vp alre zielen dach . Jnt iaer ons heeren &mring; . ccc˚ . tuee . ende . tuintich -