Corpus Van Reenen-Mulder (CRM14): Oorkonde D002p32401

Allen den ghenen die dese lettren sullen zien / jof horen lezen / wi lants Scepene van tsgrauen~zande maken kenlic / ende orconden / dat Jacob maertijn voer ons quam / ende verlyede him sculdich wezende . Sestien . scelling hollants vry ghelt / Jaerliker renten EEwelike staende / die Clarisse Jacob scinkels dochter daer god die ziele of hebben moete / gaf in rechter aelmossen voer haer ziele , Jn deser maniere , dat die prochghipape van den zande sel hebben elkes iaers . vijf . scelling . / die heylighe gheest aldaer . iij . scelling . ende die beghinen aldaer . achte . scelling . / ende dese vorghenoemde renten sel Jacob alle iare betalen te kersauonde als van lanthuer recht is , ende dese vorghenoemde renten heuet Jacob verzekert ende verwilcord vp elft + alf hond lants in sulker mate als sij lecghen , Die . sest + alf . hond lecghen int zuytland / ende heuet beleghen vp die nortzide hughe buyse / ende vp die zuytzide ghisels kinder vt den niewe_lande / ende die . vijf . hond lants lecghen int nortland ouer die kreke bezuyden weghe , ende heuet beleghen gielijs pijl vp die nortzyde / ende magriete Jacobs moeder vorghenoemd vp die zuytzide , Omme~dat dese dinghe vasste ende stade bliue , zo hebbe wijt Scepene vorghenoemd bezeghelt met onsen ghemeenen zeghele / ghegheuen vp zente pontyaens dach , Jnt iaer ons heeren . M˚ . ccc˚ . viere . ende . tuintich