Corpus Van Reenen-Mulder (CRM14): Oorkonde D002p34401

Wj wouter wouters zoen Ende Dideric van den rine / Scepenen in sgrauenzande / Oerconden met desen lettren / Dat voer ons quam haer jan van culenborch priester ende gaf den heylighen gheest toet sgrauenzande alzulke liif~renten alse haer gherard ziin broeder hem ghemaket hadde durende toet zinen liue ende na zire doet (onleesbaar) den heylighen gheest te bliuen welke renten staende ziin vp dat huys en_ erue daer jacob larke vp te wonen plach en_ gherard oem nu vp woent / ende droech vp den heyligheest~meesters toet sheyligheests behoef van sgrauenzande al recht dat hi hadde an dien voerscreuen goede ende verliede dat alle brieue doet ziin die hi daer vp sprekende hadde iof noch hebben mochte / en_ dat al dat recht dat hi daer an hadde vrieliken en_ gheheelliken des heyligheests eyghen is / Jn kennessen bezeghelt met onsen zeghelen / Ghegheuen in sente marien magdalenen daghe / Jnt iaer ons heren Duzent drie + hondert ende vier ende viertich - -