Corpus Van Reenen-Mulder (CRM14): Oorkonde D002p34802

Jn den name des vaders des zoens En_ des heylighen gheests / Jc auezoete dideric meliis zoens wedewie Make miin testament wetende miinre viif zinnen / En_ bi rade alse miins prochipapen haren jans van vtrecht / Jn den eersten gheue ic en_ bespreke voer mire zielen in rechter aelmossen viif hont lands achte roeden min eweliken staende na mire doet gheleghen ziin after dat hof an die zuidzide van dien vier honden lands daer dideric meliis zoen ziin jaerlix testament vp heeft bezet / vp dit voerscreue_ land gheue ic miinre moederkerken in sg_uenzande tuee scellinghe iaers / Den prochipape vier scellinghe iaers maer alsoe langhe alse ic leue zel ic gheuen den p_chipape . xij . d_ iaers voer ymmezoeten mire dochter / ende na mire doet soe zel bliue_ dien p_chipape vier scellinghe iaers ewelike alse voerscreue_ is / En_ hi zel mire dochter eweliken noemen met mi in den bede~brief Voert den capellaen van onser v_uwen outaer xii d_ iaers / ende den capellaen van sente niclays outaer xii d_ iaers / Den gasthuse ij s_ iaers / Den vier ordinen / den jacoppine_ den augustine_ den minderbroeders en_ onser vrouwen broedere te haerlem haerlike xii d_ iaers / haren nyclais vlaminc xviij d_ iaers toet zine_ liue na ziinre doet te comen te papeliker p_uen int gasthuys alsoe verre alse daer in een pape in ghep_uent ware ende waer dat zake datter gheen priester in zonghe dat die heylighe gheest dese voersproken xviij d_ iaers inname toet der tiit datter een priester in ware / Voert bespreic martiin cornoy minen neue vp dit voerseide lant viij s_ iaers alse voer mijn onrecht in deser manieren na ziin doet te com_ vp jan zine_ broeder iof vp zine kindere en_ storue jan cornoy zonder blikende boerd sel die heylighe gheest dese viij s_ iaers an~vaen en_ voert innem_ voert bespreic ic den heylighen gheest toet sg_uenzande / wat dese viif hont lands voerscreue_ meer rente_ iaers dan dit voersproken iaerlix testament loept ende daer om zel hi hem allen voerscreue_ haer iaerlix testament van iaer te iaer vytreeken na mire doet Ende waer dat zake dat ic een half iaer luttel min iof meer storue / Eer die eerste dach van desen iaerlixen renten verscenen ware Soe wil ic dat die heyligheest~meesters half die renten in~nemen en_ gheuen yeghelike na dat hem gheboren mach en_ die ander helft willic dat ga daer zi toe behoert te com_ / en_ voert alle iaer dat men al dese iaerlix rente alsoe groet hem allen voerscreuen vytreke als ic hem hier voren besproken hebbe en_ dese brief hout hier voren / En_ soe is ymmer miin vterste wille ghesciede dat yemant dit voerscreuen land mi of~wonne iof den ghenen die ic dese iaerlixe renten besproken hebbe Dat miin voerscreue_ testament algheheel bliue eweliken staende vp die helfte van tien honden lands gheleghen after thof van der noerdziden jn te nemen in allen manieren alse ic miin testament voerseit gheordiniert ende ghezet hebbe vp dese voerscreuen viif hont lands achte roeden min / en_ soe bespreic ic haren niclays den ries xii d_ vp dit zelue voersproken land / en_ an ghelde xii d_ / want ic dit voerscreuen testament onwederroepeliken stade ende vaste houden wille / hebbe ic ghebeden eerzamen luden en_ wisen haren Dideric van bomel minen prochipape en_ haren pieter tolnaer dat zi desen brief hebben bezeghelt met haren zeghelen Ghegheuen des vridaghes na sente martiins dach in den zomer jnt iaer ons h_en duzent drie + hondert en_ acht en_ viertich - -