Corpus Van Reenen-Mulder (CRM14): Oorkonde D002p34803

Jn goeds name amen Jc auezoete dideric meliis zoen wedewi Make miin testament wetende mijnre viif zinne en_ machtich miins lechames En_ bi rade alse miins prochipapen haren jans van vtrecht / jn den eersten gheue ic en_ bespreke voer mire zielen in rechter aelmossen viif hont lants achte roeden min eweliken na mire doet gheleghen ziin after dat hof an die zuidzide van den vier honden lands daer dideric meliis zoen ziin iaerlix testament vp ghezet heeft vp dit voerscreue_ testament land gheue ic miinre moederke in sgrauenzande tuee scellinghe iaers den prochipape vier scellinghe iaers maer alsoe langhe alse ic leue zel ic gheuen den prochipape tuaelf penninghe iaers voer ymmezoeten mire dochter / ende na mire doet soe zel bliue_ den prochipape vier scellinghe iaers ewelike staende alse voerscreuen is En_ hi zel mire dochter eweliken noemen met mi in den bede~brief / Voert den capellaen voer onser vrouwen outaer tuaelf penninghe iaers ende den capellaen voer sente nyclais outaer tuaelf penninghe iaers / den gasthuse tuee scellinghe iaers voert den vier ordinen den jacoppine_ den augustinen den minderbroederen en_ onser vrouwen broederen te haerlem haerlic tuaelf penninghe iaers haren nyclaze vlaminc achtien penninghe iaers toet zinen liue na zire doet te comen te papeliker prouen int gasthuys alsoe verre alse daer in een pape gheprouent waer En_ waer dat daer gheen priester in en + zonghe dat die heylighe gheest dese voerscreuen achtien penninghe iaers in~name toet der tiit datter een priester in waer / voert bespreic martiin cornoy minen neue vp dat voerseide lant achte scellinghe iaers alse voer miin onrecht in deser manieren na zine doet te comen vp jan zine_ broeder iof vp zine kinderen Ende storue jan cornoy sonder blikende boert sel die heylighe gheest dese acht scellinghe iaers an~vaen en_ voert innemen Voert bespreic den heylighen gheest van sgrauenzande wat dese viif hont lants meer renten dan dit voersproken iaerlix testament loept / Ende daer om zel hi hem allen voerscreuen haer iaerlix testament van iaer te iaer vyt~reken na mire doet / Ende waer dat sake dat ic een half iaer luttel min iof meer storue eer die eerste dach van desen renten voerscreuen verscene_ ware / Soe wil ic dat die heylighe~gheest~meesters half die renten in~nemen en_ gheuen yeghelike na dat hem gheboren mach / En_ die ander helft willic dat ga daer zi toe behoert te comen En_ voert dat men alle iaer alle dese iaerlix rente_ alsoe groet hem allen voerscreuen vytreken alse ic hem hier voer besproken hebbe en_ dese brief hout hier voren / En_ soe is ymmer miin vterste wille ghesciede dat yemant dit voerscreuen land mi of~wonne iof den ghenen ? + ? ic dese iaerlixe renten besproken hebbe dat miin voerscreuen testament algheheel bliue eweliken staende vp die helft van tien honden lands gheleghen after thof van der noerdziden in te nemen Jn allen manieren alse ic miin testament voerseit gheordineirt ende ghezet hebbe vp dese voerscreue_ viif honden lands achte roeden min En_ soe bespreic ic haren nyclaze den ries tuaelf penninghe vp dat zelue voersproken land ende an ghelde tuaelf penninghe / want ic dit voerscreue_ testament onweder~roepeliken stade ende vaste houden wille hebbe ic ghebeden Eerzamen luden en_ wisen haren dideric van bomel minen prochipape en_ haren pieter tolnaer priester dat zi desen brief hebben bezeghelt met haren zeghelen / Ghegheuen des vridaghes na sente martiins dach in den zomer / jnt iaer ons heren dusent drie + hondert en_ acht en_ viertich - -