Corpus Van Reenen-Mulder (CRM14): Oorkonde D002p35302

JN den name gods . Amen . Wi bartelmees jacobs zone . Ende lizebeth mijn wijf / Machtich onser vijf zinne / ende ghesonts lijfs / Maken ende ordinieren onse testament / om zalicheyd onser zielen Jn manieren als hier na ghescreuen staet . Jn den eersten so bespreken wi den heylighe_ gheest tot sg_uenzande ter amer + lude behoef . jn rechten testamente / en_ in rechter aelmosse / Ene morghen lants luttel min / of meer / also als si gheleghen is bi pieter jans zoens / streckende va_ den groene_~weghe . tot an den ouden~dijc / En_ heeft beleghen heynric hoochuys . an die nortzide met erue . En_ an die zuytside / pieter jans zone / Voort / so hebben wi legghende . vierd + alf hont lants luttel min of meer Jnt norland vp die zandelinghe / hier op bespreke_ wi onse prochipape tsg_uenzande . Twee scellinghe / holl_s . iaerlix ewelike staende en_ vor ons te bidden / En_ wat dese vorscreue_ vierd + alf hont meer Renten dan Twee scellinghe / dat bespreke wi den vier biddende ordine_ / den minre~broeders . en_ den augustinen tot dordrecht / En_ onser vrouwen broeders en_ den jacobinen tot haerlem / al ghelike te delen onder hem / dit vorseyde lant heeft beleghen an die oestzide heynric hoochuys / En_ an die westzide piet_ hoochuys / Dien eyghendom va_ al desen vorghenoemde lande gheuen wi den heylighe_ gheest / mar die bruycwaer willen wi behouden tot onser beyder doot toe / onse nooturft of te nemen / En_ willen dat die heylich~geest~meest_s dit vors_ lant na onser beyder doot ane~vaen en_ die renten iaerlix vyt~reken als vorscreue_ staet . voort so willen wi dat die heylich~gheest~meesters drie wassen kaersen alle iare barne_ tot onser iaerghetiden / Om~dat wi willen / en_ onser beyder vterste wille is / dat dit jeghe_wordighe testamente stade en_ vaste bliue / So hebbe_ wi ghebeden ene_ Eersamen man . H_en jan van aernem / onsen prochipape / dat hi dit bezeghelen wille met sinen zeghele . En_ jc jan prochipape va_ sg_uenzande vors_ / om bede wille bartelmees en_ lizebetten sijns wijfs vorghenoemt / heb ic desen brief bezeghelt met minen zeghel . Ghegheue_ Jnt jaer ons h_en . M˚ . + ccc˚ . + Drie ende vijftich / vp Sente symons en_ juden auond / apostolen - - -