Corpus Van Reenen-Mulder (CRM14): Oorkonde D002p36401

JC ian van aernhem prochipape jn sgrauenzande Make cont ende kenlijc allen luden Dat gherijt woestlant en_ bely siin wijf machtich hoers lijfs en_ wetende hoerre vijf zinnen bezetten en_ gheue_ jn rechten testament den heylighen gheest van sgrauenzande die helfte van vierd + alf hont lants die si legghende hebben Jnt oudelant / vp welc lant kerstine martijns beset heeft voer hoor ziele twe achtendeel tarwe eweliken staende en_ alle jaer te delen den armen vp den goeden vridach Ende willaem hannen zoens zoen beleghen heeft ten west~ende met leenne Die Capelle van hontsel ten oest~ende met erue Die kerke van sg_uenzande vp die zuit~side met erue Ende dirc van den rijn vp die noort~side met erue Djt voerseide lant sellen si bruken also langhe als si leuen ende na hoerre beider doet soe sellent die heylighe~gheest~meesters die nv sien of namaels wesen sellen aen~vaen toet enen vrien eyghen toet heylighes gheest behoef voerscreue_ Jn orconde des briefs heb ic jan van aernhem prochipape voerscreue_ desen brief bezeghelt met minen zeghel Ghegheuen jnt jaer ons h_en M˚ ccc˚ vier ende tsestich vp sente lucien dach