Corpus Van Reenen-Mulder (CRM14): Oorkonde D002p39701

Jn goets name amen : Jc katrijn hughen beghine toet sg_uenzande Machtich mijns lijf en_ wetende mijnre vijf sinnen bi minen gaen en_ staen en_ bi rade mijns p_chipapen haren arnts van diest Make mijn testament jn den eerste_ gheue ic en_ bespreke in rechten testamente en_ in rechter aelmossen ymme_ jan michiels zoens dochter beghine mijnre niften een pont holl_s jaers payments na mijnre doet welc pont jaers ic haer verseker op alle mijn lant / dat ic hebbe jn den ambocht van monster en_ so waneer dat ymmen ghebrake so soude die heylighegheest toet sg_uenzande daer of hebben tien scellinghe jaers eweliken staende en_ die formerie jnt beghijn~hof al~daer tien scellinghe jaers eweliken staende en_ hoe men dit lant loet daer willic dat dit pont jaers vyt gaet van minen deel voert so hebbe ic ymme jans dochter voerscr_ mijn testament mede ghemaect ghesont mijns lijfs en_ wetende mijnre vijf sinne en_ by rade Mijns p_chipapen voerscr_ jn den eersten gheue ic en_ bespreke jn rechten testamente en_ in rechter aelmossen katrinen mijnre Moyen voerscr_ na mijnre doet tien pont holl_s payments te ontfanghen vyt minen reetsten goed en_ na hare doet te comen vijf pont den co_uent jnt beghijn~hof voerscr_ en_ vijf pont der formerien aldaer en_ waert dat yement dit testament weren woude so bespreken wi katrijn en_ ymme beghinen voerscr_ den heylighen gheest van sg_uenzande elcs die helfte meer dan dit voerscr_ testament is om~dat willen dat dit testament stade en_ vaste bliue en_ ymmer voort~ganc hebbe so hebben wi ghebeden onsen p_chipape van sg_uenzande voerscr_ dat hi dit testament voer ons beseghelen wille en_ ic arnt van diest p_chipape toet sg_uenzande hebbe desen testame_t~brief beseghelt om bede wille katrinen en_ ymmen beghinen voerscr_ met minen seghel jnt jaer ons h_en M˚ ccc seuen en_ tneghentich viertien daghe jn aprelle