Corpus Van Reenen-Mulder (CRM14): Oorkonde D002p40002

Jc dirc gherijt monts soen priester doe cont en_ kenlike allen luden dat ic ghegheuen hebbe en_ gheue puerliken om gode die twintich scellinghe hollanche jaers die mi van gherijt mont mine_ vader en_ van margriete_ mijnre moeder ghebleuen sijn op ghise fien soens huus en_ drie morghe_ lands sprekende als die brief daer of hout den armen beghinen te sgrauenzande die een helfte en_ die ander helfte der capellen den dienste gods te helpe_ jaerlike en_ so beghere ic om god dat zi een jarichtide doen alle jare voer mijns vader ziele en_ mijnre moeder en_ mijn ziele op den tienden of op den twaleften dach na zente martijns daghe in den winter Ende want dit mijn vterste begheerte en_ wille is So hebbe ic desen brief open beseghelt met minen seghele Ghegheuen jnt jaer ons heeren dusent vier hondert op sente pieters dach ad cathedram