Corpus Van Reenen-Mulder (CRM14): Oorkonde D005p38401

Jc willaem jans soen van dolre knape Doe cont alle_ luden . dat ic vercoft hebbe h_en adam van berwaerde ridder minen neue een wierande of bosschelken dat gheheten is die oude boemgaert . gheleghen westwaerts van der haghe bi der monicke houe / mit erue mit boeme ende mit allen sine_ toebehoren . alsoe groet ende alsoe cleyn / alst begrepen heeft . hem des te ghebruken tot sine_ besten orber ende / te + houde_ in alle_ scine als ict nv houde van minen lieue_ ghenadighe_ h_e van hollant . van welcken bosschelken voers_ ende van den cope daer of mi heer adam voers_ vol en_ al betaelt heeft ende wel voldaen den lesten penninc mit den eersten . Alsoe dat ic mi wel ghepayt houde ende scelde h_en adam voers_ en_ sine_ nacomelinghe / voer mi en_ mine nacomelinghe daer of vry en_ quijt tot ewighen daghen . Ende bidde en_ versoeke oedmoedelike_ mine_ ghenadighe_ here hartoghe aelbrecht van bey_en Ruwart van henegouwe_ en_ van hollant . dat hi bi sijnre ghenaden / sinen wille en_ sijn consent / hier toe doen wille ende here_ adam mine_ neue voers_ des goedekens mit allen sine_ toe~behoren / als voerscreue_ is / volghen late ende ghebruken . Ende hem des verlien wille te houde_ in allen scine / en_ rechte als ict tot haer toe ghehoude_ hebbe Ende waert / dat heren adam mine_ neue voers_ hier in enich hinder of stoet viele . Alsoe dat mijn ghenadighe h_e voers_ hem des goedekens voernoemt niet en verliede of verlien en woude / soe soude hi sijn gheldeken weder verhalen en_ jn~nemen / van alzulcke goede / eyghen / of loen / renten of lant . als ic legghende hebbe jn den ambochte van der haghe . Ende ic gheloue hem in goeden trouwe_ . / dat ic mine hande daer of trecken sel . ende hem dier renten ghebruke_ en_ volghe_ sel laten / mit ruste_ zonder enich weder~segghen / ter tijt toe / des hi tsijn vol ende al weder in heeft . behoudelic . dat mi die renten van mine_ goede die nv verscine_ zulle_ / tote voerscoter en_ valckenburch~marcte naest comende vrylic volghen en_ bliue_ zulle_ in mine_ hande_ / of daer ic se wise . waert oec / dat mijn ghenadighe h_e voers_ hem des Goedekens voerscreuen gonnen woude en_ verliede . ende hi yet van mine_ goede of renten / op ghebuert hadde / dat soude hi mi vol en_ al weder wt~reyken ende voldoen . des soude ic hem weder ghegheue_ / en_ betalen bouen sine_ hoeft~ghelde wes cost hi aen den ouden boemgaert voers_ gheleyt hadde die hi mit reden bewizen mochte / Ende omme~dat ic alle dese voerwaerden wittelic en_ wel meen te houden / als voerscreue_ is . soe hebbe ic dese_ brief open bezeghelt mit mine_ zeghele / Ghegeue_ des saterdaghes na zinte pieters en_ sinte pouwels daghe apostelen . Jnt jaer ons heren . m + . ccc + . vier ende tachtich