Corpus Van Reenen-Mulder (CRM14): Oorkonde D505r37701

Wij Scepen jn die haghe Doen condt allen luden dat voir ons quam griete jan vvinkelmans ende beliede sculdich te vvesen tgoetshvvs van heykendunen drie scellinghe holl_nts jair eevvelic staende ghelt dair + men wijn en_ broet om coept alle jair te betalen tot voirscoter marckt Ende dit heeft sij virsekert ende virset op een stic lants dat ghehieten is die loe ende belegen heeft nv ten tijden op die oest~side claes arnts zoen en_ vp die vvest~sijde will_m pieters soen behouden den heer sijn Recht jn ke_nes der vvairheit so hebben vvij desen brief open beseghelt mit onsen gemenen seghel jnt jair ons he_en duysent drie + hondert seuen en_ tseuentich des diinxdaghes na alre kinder_ dach