Corpus Van Reenen-Mulder (CRM14): Oorkonde E043p30301

Alle die dese letter sullen zien ochte horen lesen orekunde wi gherart van raephorrst ridder willaem van haerlem dideric van wassenaer bartolomeus vter wike ende jan van roellant des Goetshuse manne van Egmu_de dat wi waren ghedaghet tegmu_de van onsen here den Abt ende sien conue_t toet enen parleme_t dat zi hadden thiegens Gheie Jans soen ende sine helpers ende die bure also van den lande tvisken are_merswet ende wim_erswet dat zi ane~spraken toet hare erfhure dat die abt ent conue_t weder~seiden ende betoechden met goeden letteren van den eersten Graue ende van den andren dat al dat voerghenomede lant haer vrieeighen ware ende den pawes van romen van den neghenden Ghraue opghegheuen ten vrien eighendoem daer siiet of helden als tote enen tense . Dit parleme_t wart bedreuen bi ons en_ bi anders des Ghoetshues manne die daer toe ghedaghet waren van ordeil toet ordeil also verre dat ten~lesten bi ene_ ordeil dat pilgriem willaems scouten soen onder hadde tghewiset waert dat die abt voerghenoemt weten soude met ene_ rechte hoe sii dat lant besitten souden doe dat ordeil voilvolghelt was van den ma_ne_ ende ghedult van dander side wart Gherarde van raephurst ridder ghevraghet eins ordels wie dat metten Abt dat weten souden doe rekende gherart ende wisede ende warts gheuolghet hem dat die Abt dat weten soudenent Conue_t met hem . - - dese ordeil gheent ende voluaren wart Dideric haren wouters + soen ghevraghet hoe zi dat weten soude die wisede bi + der hulde die zi scoudich waren sente alebrecht haren paetrone . Doe dese ordeil volvaren waren en_ ghedeilt van dander siede openbare~de onse here die abt zine sententie en_ ein moenc van sire weghen die zine tale helt want hem ghewiset wart dat hiet wel doen moste want hij selue zine tale qualike vermochte aldus bi der hulde die hi scoudich waren sent albrecht wisede hi den pawes van romen den eighendoem van al des goetshues goede hem en_ den conue_t die waren en_ comen souden die orebaer en_ de vruecht den buren alselke ghenade alse si bi sine_ tiden hadden en_ voer die ghenade begherden maer die op rechte ghedinghet hadden en_ thieghens hem dien ontwisede hi al haer goet . Doe dese tale gheent was en_ aenghenome_ sprac de selue moenc van des conue_ts weghen die sente_tie voerghesproken bi + der seluer hulde want hem oec + ghewiset wart met ene_ ordeil dat siet wel doen moeste_ also verre alse zi lieden aen sine tale alse zi deden . Jnde wart ghevraghet dideric van wassenaer ochte also vele daer toe ghedaen waer alst recht ware die rekende en_ wiesede en_ hem warts ghevolghet datter ein volrechte toe ghedaen waere Daer sturte die ghei jaen soen enwech met sire parthie en_ die bure en_ worden ghewiset boetscoudich van jan van rollant die dat ordeil ghevraghet wart . Ende omdat dese stecken vast en_ ghestade bliuen soe hebbe wj dese letter gheseghelt met onsen seghelen i_ ein orekunde In der jair ons heren Dusent drie hondert en_ drie des wonesdaghes na derthiende~dach .