Corpus Van Reenen-Mulder (CRM14): Oorkonde E043p30401

Alle die dese letter sellen sien ochte horen lesen orconde wi wernaer bi + der ghenade goets abt van Ekmu_de dat albrecht wouters zone bi onsen moet~wille heft ghecocht tieghens Wouter roiderics zone dat Litteke~sant dat die Wouter helt the lene van onsen goetshuus en_ dit voerghenomede goet heeft dese albrecht voer~ghenoemt van ons ontfaen thelene rechte also alst Wouter hadde in + der maniere dat dat goet mach comen na albrechts doet vp sinen zone ochte vp sire dochter die wittelike kinder waren en_ waer dat sake dat hi storue sonder erfkinder so soud dat comen vp sinen ousten broeder vul~gheboren had hi enen broeder ochte had hi negheen so soud comen vp sire suster ende also voert vp sone ochte dochter in dier maniere als hijt heeft voert . waere dat des albrechts kinder enich daer dit goet vp ghecomen ware storue sonder wittelike kinder dat voer~ghenomede goet soude comen vp broeder ochte vp suster desghenen die dat metter doet gherumet hadde ende hadde hi no broeder no suster dat voer~ghenomede goet soude weder keren vp des albrechts broeder ochte suster had hi + se leuende ende honeer iet ghebrake van dier vorwoerde die hijr voer ghescreuen es so soud dat goet weder comen in onsen goetshuus ende om~dat dit vaste ende ghestade bliue so heb wi dese letter gheseghelt met onsen seghel jnt iaer ons heren dusent drie + hondert ende viere dies wonendaghes voer sente margreten dach