Corpus Van Reenen-Mulder (CRM14): Oorkonde E043p33301

Alle dien~ghenen die desen brief sellen sien iof horen lesen make wi cund Ende kenlike phylips van wassenare ende ghered van hemskerke Dat wi daer ouer waren met anders des godshuismanne van Egmonde / Daer lubbrecht ver heyletiane sone quam vor dien abt van Egmonde / Ende droech hem vp alle sine letteren Ende alle recht dat hi hadde ane die husinghe / Ende ane dien goede die wouter die vriese sijn broeder rumede metter doot / jn hoghen ende in laghen ende scoutet quite / Ende sochte ghenade ane dien abt zo~dat wi met hem baden dat hi hem ghenade dede / Doe beried hem die abt met sinen conuente / zo~dat hi omme godswillen / Ende om onser ghemeenre bede Lubbrechte heft ghegheuen tot sinen liue toe in lien~ware van dien godshuse te houden van egmonde drie half fiertel lands die gheleghen sijn after willaem grieten sones tuin Ende na lubbrechts doot zal twouter sijn sone houden in lijn~ware tot sinen liue van dien godshuse vorseyd / ende na wouters doot sel dit land weder comen vpt godshuis van egmonde sonder arghelist Ende jn kennesse dier waerheyde zo hebbe wi phylips ende ghered vorscreuen desen brief beseghelt met onsen zeghelen jnt iaer ons hieren Dertien hondert drie ende dertich iare des dinghes~daghes na pinxteren .