Corpus Van Reenen-Mulder (CRM14): Oorkonde E043p36301

Wi gherid van assendelf en_ heynric van ouercrofte manne des abts van Egmonde / Orkonden als manne vorscr_ dat wi daer ouer . en_ aen waren / dat ian van scoerle will_ms soen ghelouede onsen here den . abt van . Egmonde met goeden trouwen / dat hi En_ ghiertruit sijn wijf met hem ghelyen en_ beke_nen souden dat si gheen recht en hebben totten goede ofte lande dat will_m machtelde soen ghiertrude vader voirscr_ van + den . abt en_ den cloester tegmonde plach te houden te liene wantet verstoruen ware / En_ hadden si oec enich recht tot enighen goede dat will_m voirs_ van + den . abt en_ den cloester voirscr_ plach te houden dat souden si met vrien willen en_ lachenden monden quijt scelden den . abt en_ den cloester voirscr_ voer sente Jans misse te midzomer nu naest~comende / voert soe ghelouede die . abt voirs_ Jan voirscr_ dan te verlien tot enen rechten liene en_ niete vorder / alle goet ofte lant dat will_m voirghenoemt van hem En_ sinen cloester plach te houden / En_ daer of die minre helfte als ment naest gheraken mach te verlyen ghiertrude . voirsproken tot hare lijftochte En_ hier om soe gheloueden wouter aelbrechts soen . wout_ van scoirle En_ Jan voirsproken met goeden trouwen met samender hant onghesceyden En_ elc voir al te gheuene den . abt van Egmonde tot sente m_tijns misse in + den winter nu naest~comende twe en_ dertich gouden mottone En_ te meye daer naest comende twe en_ dertich gouden mottone En_ te sente iacobs misse daer naest come_de twe en_ dertich gouden mottone goet en_ gaue / En_ waer . dat sake dat si dese voirscr_ voirwaerden den . abt voirsproken niet vol en_ al en helden / soe wat cost en_ scade daer die . abt voirsproken daer bi dede ofte lede dien gheloueden si hem op te rechten metten hoeftghelde tot sinen semplen woerden / het en waer dat sake dat Jan voirscr_ noch hantvesten toghede daer hem en_ sinen wiue bet mede gheholpen ware die souden hem te staden staen / In orconde desen brieue bezeghelt met onsen zeghelen / Ghegheue_ Int iaer ons he_n dusent drie + hondert drie en_ tsestich des woensdagh_ nae ons he_n hemelvaert