Corpus Van Reenen-Mulder (CRM14): Oorkonde E043p39501

Wy Aelbrecht van scoerle en_ ysebrant loef maken condt allen luden dat wi dair ouer en_ aen waren en_ bi gheroepen als manne des goodshuys van egmond dair alijt jans dochter van oudendijc versocht an enen eersamighen vader in gode he_n jan den weent abt van egmond alsulc liengoet als jan van ouden~dijc hoer vader van + den goedshuys van egmond te lien plach te houden . en_ die abt voirs_ die verliede en_ verkende hoer dat voirs_ liengoet na inhout eenre hantveste gans en_ gaue en_ sonder rasure die wi daer saghen en_ hoerden overlesen sprekende van woirde te woirde als hier na ghescreuen staet Jan die weent bi + der ghehennesse goods abt van egmond doen condt allen luden dat wi om bede willen ons_ ghenadighe he_n hartoghe aelbrecht van beyeren . graue van henegou_ . van hollant en_ van zeelant . en_ sijns ghenadichs zoens des grauen van oestervants verlyet hebben en_ verlient van gracien en_ niet van rechts weghen alide jans dochter van oudendijc die twie en_ twintich morghen lants legghende op scieveen in sestien~hoeuen die jan van ouden~dijc hoer vader van ons en_ van onsen goodshuyse te lien plach te houden en_ an ons bestoruen waren jn aldusdanigher manieren als dat alijt voirs_ dese voirs_ twie en_ twintich morghen sel van ons en_ onsen goodshuys tenen rechten lien houden dat sel wesen te verstaen dat si dit voirs_ liengoet sel eruen moghen op haren zoen en_ also voirt van zoen te zoen wittelike gheboren en_ anders niet En_ wair dat zake dat die leste besitter des voirs_ goets ghenen wittachtighen zoen na him en liet so soude dit voirs_ liengoet vriliken wedercomen an ons en_ onsen goodshuys en_ mit desen so sellen alle oude hantvesten ghedoot wesen die van desen lien spreken hier ouer waren aelbrecht van scoerl en_ ysebrant loef als manne des goedshuys . En_ odsier hughe En_ bertolomees pieter venijns z_ Jn oirconde desen brief bezeghelt mit minen zeghel Ghegheue_ in + den jaer ons he_n dusent drie + hondert vijf en_ tneghentich des anders daghes na sinte marcus dach En_ want wi hier ouer en_ an waren als . voirscr_ is so hebben wi als goodshuys manne bi consent odsierhughen en_ bartolomees pieter venijns z_ jn kennesse der waerhede desen brief beseghelt mit onsen zeghelen Ghegheuen int iair ons he_n dusent drie + hondert vijf en_ tneghentich des anders daghes na sinte Marcus dach