Corpus Van Reenen-Mulder (CRM14): Oorkonde E058p39203

Baernt claes zoe_ en_ iacop pieters zoe_ scepe_ in hoorn orconden en_ kenne_ dat voer ons quam jan die rode ians zoen ende gheliede dat hi ghehuurt heft tot eweghe_ pacht tieghens jan den roden claes zoen alsoe alse dese ia_ rode claes zoe_ voersc_ een voghet is va_ gherbra_t hare_ andries zoen den coster tot hoorne een stucke erfs dat toe~bihoert der costerien tot hoorne gheleghe_ binne_ der vryhede van hoorne ddat rietlant datter gheleghe_ is after der heyligher kerke_ van hoorne die halue brede op die suut~side oestewaert an te taste_ an mieus bankert en_ an iacop pelgre_s zoe_ die oec mede daer erue ghehuurt hebbe_ westewaert streckende twintich roeden lanc wtgheseit dat op die noert~side allancs dit voerseyde erue legghende sellen bliue_ vijf roedevoet_ tot ene_ ghanc~pade welc erue voersc_ op die suut~side bileghen heft gheriit van heemskerke om ene_ halue_ vrancriicsche_ scilt ioft payment na siinre waerde vriis ghelts welke hure in~ghenc opte_ meyien~dach lest~gheleden te bitalen alle iaer dese voerseyde hure die ene helfte tot alder goeds heylighe_ daghe en_ die ander helfte tot meyie Om~dat dit waer is en_ ons dit kenlic is soe hebbe wi desen brief biseghelt met onsen seghele_ jnt iaer ons he_n dusent drie + hondert twie en_ neghentich des vrydaghes na sinte bonifacius dach