Corpus Van Reenen-Mulder (CRM14): Oorkonde E097p37002

Wi willaem van scoten / ysebrand van der scure dirc die blote En_ ghisebrecht hobben soen scepene in haerlem oirconden dat voir ons quamen int gherechte garbrand didde~michiels soen En_ tydeman ziin broeder en_ daer een zegghen zeyden twischen Reyner doeuen~soen an die ene zide En_ valken pieters~soen an die ander zide alse van viiftich roesede mottoene daer reyner voirs_ of aen~ghesproken hadde valken voirnoe_t dat hi hem die te scade ghedaen hadde an sinen lande tot akersloet des si an beyden ziden ghelieden dat ziis an den tween zegghers voirscr_ van dien scade ghebleuen waren hoer zegghen te houden en_ te voldoen op ene pene van hondert scilden En_ die pene te gaen daer ze die zegghers voirnoe_t metten rechte van haerlem wizen zullen / En_ die te ghelden die hoer zegghen niet en helde noch en voldede / daer hoer zegghe_ of was In den eersten dat valke comen zel een vridaghe naest~comende tot akerslote En_ maken reyner doeuen~soen daer ene beloken hand En_ zweren met dat hi op~brengt en_ of~laet En_ si viue en_ twintich met hem van akerslote En_ van wermer die hem volghen / dat hi hem daer mede verbetert heeft alle zine scade die hi hem ghedaen mochte hebben an zinen goede tot akerslote / En_ waer dat die scoute van akerslote hem dien eed niet stauen en woude / So soude valke voirnoemt sinen stauer voir hem brenghe_ op sinen cost / En_ waer dat zake / dat valke voirs_ dit recht niet en dede in alle_ manieren als voirsc_ staet So soude hi Reyner doeuen~soen gheuen die viiftich roesede mottoene daer hi hem om beclaecht heeft En_ dit voirscr_ zegghen te houden en_ te voldoen is borghe tydeman didde~michiels soen voir valken voirnoemt En_ mag - ysebrands soen voir reyner doeuen soen Jn Oirconde desen brieue beze_ met onsen zeghelen Int Iaer ons he_n m + . ccc + . en_ tseuentich des vridaechs na sinte baefs dach