Corpus Van Reenen-Mulder (CRM14): Oorkonde E097p38101

Wii hobbe hone Symon van der scine ende Eueraert van dyemen scepene in hairlem oirconden dat voir ons quam Jan boudiins soen scoute in haerle_ ende gheliede dat hi ontfaen heeft van Jan eylaerts soen ghisebrecht dirc meysters soen Ende van claes gheriit zuutvoets soen drie hondert ende dertich pond holl_ts payments alse van den huse metten erue dat claes eylaerts soens was / Item so gheliede hi noch ontfaen van jan eylaerts soen ende van claes gheriit zuutvoets soen beide voirnoemt zesse ende viertich pond en_ viif scilt payments voirscr_ alse van eenre hofstede die claes eylaerts soen was / Item so gheliede hi noch ontfaen van ynboedel / biencouwe en_ van alre~hande tille goede dat claes eylaerts soens was / te~zamen hondert tseuentich pond zeuentien scell_ en_ elf pe_ninghe / maect alte~zamen siin ontfang van claes eylaerts soens goede ghemaect viif hondert zeuen ende viertich pond twie scell_ ende elf pe_ninghe in holl_s paymente / welc voirsc_ huus / erue / ende tille goet voirscr_ symon van gheruliet alse een rechter van haerlem van s + he_n weghen vercoft hadde zulke scoud mede te betalen alse claes eylaerts soen voirnoemt sculdich was doent oirconden wi scepene voirnoemt dat jan boudiins soen scoute in hairlem voirghenoemt van s + he_n weghen als een rechter met desen voirscr_ ghelde betaelt heeft claes eylaerts soens scoud voirnoemt van den oudsten brieuen eerst alse scepene van haerlem met vonesse ghewiist hadden dat hi scoudich was te doen / In den eersten Symon van zaenden als een raet van + der stede weghen van haerlem van afterstallighen renten staende vp den huse metten erue en_ vp die hofstede daer an legghende die claes eylaerts soens waren vp die Oude grafte zestien pond dertien scell_ en_ vier pe_ninghe Item hughen van assendelf van der stede weghen van haerlem als een iaer van hure en_ van voerhure staende ende verscenen vp den huse metten erue en_ vp die hofstede voirscr_ achte pond / Item claes van der + lane en_ jacob sinen broeder godeuaert zaenderlands twien zeuen van enen scepene~brieue in~houdende hondert ende twintich pond payments een oud vrancriix scilt gherekent voir twie ende dertich scell_ staende vp renten dat hoeft~ghelt metten renten verscenen te~zamen gherekent hem ghegheuen hondert zesse ende dertich pond dertien scell_ en_ vier pe_ninghe It_ baertout van assendelf van enen scepene~brieue inhoudende hondert ende achte pond daer of hem betaelt van ghebreke des brieues zestien pond Item zullen claes eueraerts soens wedue van enen scepene~brieue inhoudende viere ende tachtich pond ende achte scell_ daer of haar betaelt van ghebreke des brieues twie ende tseuentich pond en_ achte scell_ / Item jan eylaerts soen van enen scepene~brieue zesse en_ viertich pond dertien scell_ ende vier pe_ninghe / It_ jan van der + lane pieters soen van enen scepene~brieue achte ende tsestich pond ende viif scell_ / Item willaem van adrickem dyedwiins soen van enen scepene~brieue zesse en_ tseuentich pond viif scell_ en_ vier pe_ninghe / Item aliit van dust mathiis allaerts soens wiif van enen brieue houd zeuentien pond / daer + of haer ghegheuen van ghebreke des brieues drie pond dertien scell_ en_ achte pe_ninghe / Item claes gheriit zuutvoets soen van enen scepene~brieue inhoudende drie ende tneghentich pond heren ghelts / maect in paymente hondert viere ende twintich pond dair of hem betaelt in minringhe van dien brieue met neghen ende twintich ponden daer hi an ghewiist is alse van den afterstalle van den ynboedel en_ tille goede alte~zamen gherekent hondert pond ende drie ende twintich pe_ninghe Item heynric sciws van sinen lone dat hi screef int boedel~huus doe tille goet vercoft wart bi den rechte hem ghegheuen vive en_ dertich scell_ en_ achte pe_ninghe / Item claes erfname van der + lane van sinen lone in den boedelhuse bi den rechte hem toe~gheseit dertien scell_ en_ vier pe_ninghe / alle betalinghe voirscr_ gherekent in holl_s paymente dus beloept dat wtgheuen voirscr_ en_ betalinghe ouer~een metten ontfanghe voirsc_ / deser brieue siin drie Jn oirconde desen brieue bezeghelt met onsen zeghelen Jnt Jaer ons he_n . m + . ccc een en_ tachtich vp sente margrieten auond