Corpus Van Reenen-Mulder (CRM14): Oorkonde E097p38201

Wj ghisebrecht van raphorst ende haghen jacops zoen scepene in hairlem Oirconden dat voer ons quam willaem coppe neuen zoen ende op gaf tot ene_ vryen eyghen den gasthuusmeesters tot den gasthuus behoef een huus metten erue legghende ende staende in die cleyn houtstrate twisschen jutte jan scoenaerts an die ene side ende die strate an die ander side ende verliede al betaelt den lesten penninc metten eersten ende heeftet hem gheloeft te waren met zulker hure als daer op staet In Oirconde dezen brieue bezeghelt met onzen zeghelen jnt jaer ons heren mccc twie ende tachtich sonnendaghes na dertyene_~dach