Corpus Van Reenen-Mulder (CRM14): Oorkonde E097p38202

Wi hughe bake ende florens scoudy scepene in haerlem orconden dat voor ons quam jan zibrants zoen van sloten ende verliede dat hi den nuwen gasthuse tote h_lem ghegheven heeft tot enen vryen eyghen voer zulke prouen als hi in den gasthuse voerscr_ heeft na inhoude ziins briefs die helfte van drien husen metten eruen onderdeel dat legghende en_ staende in poezelaers~steghe twisken jan heinen zoens scure an die een zide en_ zoete westualiix~lant an die ander zide streckende afterwaerts an zoeten voorscr_ dat ander in die zelue steghe daer ieghens~ouer twisken dirc ?~??????? an die een zide pieter zibrants zoen van sloten an van sloten an die ander zide after streckende an pieter gheriit claes zoens zoen dat derde in die nuwe steghe an die grote houtstrate ende ziin drie cameren metten erue die helfte daer of onder~deel twisken jan jacops zoen op die een zide zoete hertghers an dander zide . afterwaerts streckende an jan jacops zoen voorscr_ met zulker hure als op elc staet hier~en~bouen heeft jan zibrants zoen den nuwen gasthuse voer die voornoemde prouen ghegheuen eyghentlic alle goet dat hi anders heeft ende dat hi namaels vercrighen mach met bestorften of in wat manieren het si ende heeftet hem gheloeft te waren als hi sculdich es te doen . in orconde desen brieue bezeghelt met onsen zeghelen int jaer ons he_n mccc twe en_ tachtich tsaterdaechs na onzer vrouwen dach purificatio